اسرائیل ،ایران جنگ کے باعث پاکستان کا فلائٹ آپریشن متاثر، متعددپروازیں منسوخ

اسلام آباد:ایرانی سرزمین پر اسرائیلی جارحیت اور ایران کی بھرپور جوابی کارروائیوںکے بعددونوں ممالک کے درمیان کشیدگی عروج پر ہے جس کے باعث خطے کے دیگر ممالک کے لیے بھی مسائل پیدا ہو رہے ہیں۔ 

ایران اسرائیل حالیہ کشیدگی کے دوران پاکستان کا فلائٹ آپریشن مسلسل متاثر ہو رہا ہے۔

ایوی ایشن حکام کے مطابق پاکستان سے متعدد ممالک کو جانے والی فلائٹس منسوخ اور تاخیر کا شکار ہیں، جن میں کراچی سے جدہ، مشہد، بغداد اور تہران روانہ ہونے والی 8 پروازوں سمیت مجموعی طور پر 16 پروازیں منسوخ کر دی گئی ہیں۔

ایرانی فضائی حدود کی بندش کے باعث اسلام آباد سے نجف جانے والی غیر ملکی ایئر لائن کی 2 پروازیں بھی منسوخ ہوگئیں۔

 حکام کے مطابق جدہ، دبئی، بحرین اور راس الخیمہ سے اسلام آباد کی پروازیں بھی ایک سے 5 گھنٹے تاخیر کا شکار ہیں۔

واضح رہے کہ ایران اور اسرائیل کے درمیان جنگ کا آغاز اُس وقت ہوا جب اسرئیل نے 12 جون کو ایران کے متعدد مقامات پر حملے کر کے پاسداران انقلاب کے سربراہ، آرمی چیف اور 6 جوہری سائنسدانوں کے علاوہ 5 شہریوں کو شہید اور متعدد کو زخمی کر دیا تھا۔

اسرائیلی جارحیت پر بھر پور رد عمل دیتے ہوئے ایران نے بھی اسرائیل پر متعدد میزائل حملے کیے جس سے حیفہ پورٹ اور آئل ریفائنری کو شدید نقصان پہنچا۔

اسرائیلی میڈیا کے مطابق ایرانی حملوں کے نتیجے میں ہلاکتوں کی تعداد 25 سے تجاوز کر گئی ہیں جبکہ 200 کے قریب افراد زخمی ہیں۔