پاکستان نے "بھارتی کشمیر" لکھ کر ٹوئٹ کرنے کا معاملہ امریکی محکمہ خارجہ سے اٹھادیا

تفصیلات کے مطابق  امریکی وزارت خارجہ کا کشمیر کے حوالے سے متنازعہ ٹویٹ کا معاملہ، پاکستان نے "بھارتی کشمیر" لکھ کر ٹوئٹ کرنے کا معاملہ امریکی محکمہ خارجہ سے اٹھادیا۔

ترجمان دفتر خارجہ زاہد حفیظ چوہدری کا کہنا ہے کہ  مقبوضہ جموں و کشمیر میں 4 جی موبائل انٹرنیٹ کے دوبارہ آغاز سے متعلق امریکی محکمہ خارجہ کے ٹویٹ میں" بھارتی کشمیر" کے حوالہ پر مایوسی ہوئی ہے۔ امریکی محکمہ خارجہ کا ٹویٹ میں جموں و کشمیر کا حوالہ کشمیر کی متنازعہ حیثیت سے متصادم ہے ۔ اقوام متحدہ کی سلامتی کونسل کی قراردادوں اور عالمی برادری نے جموں کشمیر کو متنازعہ علاقہ تسلیم کیا ہے۔

ترجمان دفتر خارجہ نے کہا کہ  جموں و کشمیر اقوام متحدہ سلامتی کونسل کی ایجنڈے پر ایک دیرینہ حل طلب مسئلہ ہے، مسئلہ کشمیر بھارت کی ہٹ دھرمی اور سلامتی کونسل کی متعلقہ قراردادوں، پاکستان، عالمی برادری اور کشمیریوں سے کیے گئے وعدوں پر عملدرآمد نہ کرنے کے باعث حل نہیں ہوسکا،کشمیریوں کی سیاسی اور اقتصادی ترقی کا انحصار حق خود ارادیت کے حق کے استعمال کی خواہش سے مشروط ہے۔

زاہد حفیظ چوہدری کا کہنا ہے کہ بین الا قوامی برادری مقبوضہ کشمیر میں انسانی حقوق کی پامالی روکنے کے لئے بھارت پر دباو ڈالے۔ مسئلہ کشمیر کو اقوام متحدہ کی قراردادوں کے مطابق حل کرنے کی کوشش کی جائے۔ بھارت کی اقوام متحدہ کی متعلقہ قراردادوں پر عمل نہ کرنے کے باعث جموں کشمیر کا مسئلہ ابھی تک حل طلب ہے۔ جموں و کشمیر کے عوام کی سیاسی اور معاشی ترقی کشمیر ی عوام کے حق خودارادیت سے مشروط ہے ۔

ترجمان دفتر خارجہ زاہد حفیظ چوہدری کا مزید کہنا تھا کہ امریکہ سمیت بین الاقوامی برادری کو ہندوستان سے مقبوضہ کشمیر میں انسانی حقوق کی مسلسل اور منظم پامالیوں کو روکنے کے لئے زور دینا چاہئے۔بھارت کی من مانیوں میں غیر قانونی نظربندیاں ، لاپتہ کرنا ، سیاسی رہنماؤں کی گرفتاری ، مقبوضہ علاقے کے آبادیاتی ڈھانچے کو تبدیل کرنے کی کوششیں شامل ہیں۔سلامتی کونسل کی متعلقہ قراردادوں کے مطابق مسئلہ کشمیر پرامن حل کے لئے حقیقی اقدامات اٹھائے جائیں ۔