ملک بھر میں پری مون سون سیزن کا آغاز، آئندہ تین دنوں میں بارش کی پیشگوئی

ملک بھر میں پری مون سون سیزن کا آغاز ہو گیا ہے جس کے بعد گرمی کی شدت میں کمی آنے کا امکان ہے۔

محکمۂ موسمیات کی جانب سے آئندہ تین دن کے دوران ملک کے مختلف حصوں میں بارشوں کی پیشگوئی کی گئی ہے، بلوچستان، پنجاب، خیبر پختونخوا، گلگت بلتستان اور کشمیر میں بھی بارشوں کا سلسلہ جاری رہنے کا امکان ہے۔

محکمہ موسمیات کے مطابق 22 تا 24 جون سکھر، لاڑکانہ، دادو،جیکب آباد میں آندھی کے ساتھ بارش کا امکان ہے، ژوب، بارکھان، موسیٰ خیل، قلات سمیت مختلف علاقوں میں بارش کی توقع ہے۔ کراچی میں 25 جون سے دو جولائی تک موسم بھیگا بھیگا رہنے کا امکان ہے۔

محکمہ موسمیات کا کہنا ہے کہ صوبۂ سندھ میں کئی مقامات پر کل سے بارشیں متوقع ہیں۔

یاد رہے کہ کراچی کی حدود میں کچھ روز قبل پری مون سون سسٹم داخل ہوا تھا جس کے بعد مختلف علاقوں میں گرج چمک کے ساتھ بارش ہوئی تھی۔

کراچی کے متعدد علاقوں میں مون سون سسٹم کے باعث بادل چھانے لگے تھے اور ساتھ ٹھنڈی ہواؤں کا سلسلہ بھی شروع ہوگیا تھا۔