بھارت کی آبی جارحیت جاری، گنگا معاہدہ معطل کر کے بنگلہ دیش کا پانی روکنے کی تیاری

نئی دہلی: پہلگام واقعے کے بعد جنگی اور آبی جارحیت کے جنون میں مبتلا مودی سرکار نے سندھ طاس کے بعد بنگلہ دیش کے ساتھ بھی گنگا معاہدہ معطل کر کے پانی روکنے کی تیاری شروع کر دی۔

بھارتی میڈیا رپورٹس کے مطابق 1996 کا بھارت -بنگلہ دیش گنگا معاہدہ 30 سال مکمل ہونے پر 2026 میں ختم ہونے والا ہے“۔

گنگا معاہدے کی شق نمبر 12 کے مطابق اس معاہدے کی تجدید دونوں فریقین کی باہمی رضامندی سے کی جائے گی،تاہم موجودہ بھارتی سرکار سے ایسی امید نظر نہیں آ رہی۔

بھارتی میڈیا کا کہنا ہے کہ گنگا معاہدے کے مطابق خشک موسم خصوصاَ فرکا بیراج کے اطراف میں پانی کی تقسیم کو منصفانہ بنانا تھا۔

اس حوالے سے بھارت کی جانب سے بنگلہ دیش کو آگاہ کر دیا گیا ہے کہ ترقیاتی ضروریات کیلئے زیادہ پانی درکار ہے۔

بھارتی وزارت خارجہ کے مطابق پہلگام حملے سے پہلے بھارت گنگا معاہدہ 30 سال بڑھانا چاہتا تھا، مگر حالات یکسر بدل گئے۔

بھارت کے یکطرفہ فیصلے پر بنگلہ دیش نے تشویش کا اظہار کیا ہے،جنگی جنون میں مبتلا بھارت کی آبی جارحیت جنوبی ایشیا میں ایک نئے بحران کو جنم دے سکتی ہے۔