عمران خان سے ملاقات کے لیے علی امین گنڈاپور کا سپریم کورٹ سے رجوع

وزیراعلیٰ خیبر پختونخوا علی امین گنڈاپور نے پاکستان تحریک انصاف (پی ٹی آئی) کے بانی عمران خان سے ملاقات کی اجازت حاصل کرنے کے لیے سپریم کورٹ سے رجوع کر لیا۔

منگل کے روز علی امین گنڈاپور جسٹس منصور علی شاہ کی عدالت میں پیش ہوئے، تاہم جسٹس منصور نے انہیں ہدایت دی کہ اس معاملے پر چیف جسٹس یحییٰ آفریدی سے رابطہ کریں، جو اس وقت لاہور میں موجود ہیں۔

عدالت کے باہر میڈیا سے گفتگو کرتے ہوئے وزیراعلیٰ نے کہا کہ وہ گزشتہ کئی دنوں سے عمران خان سے ملاقات کی کوشش کر رہے ہیں اور آج سپریم کورٹ آنے کا فیصلہ بھی بانی پی ٹی آئی کی ہدایت پر کیا۔

علی امین گنڈاپور نے بتایا کہ عمران خان نے ملاقات کی اجازت کے لیے عدالت کو باقاعدہ تحریری درخواست دی تھی، جس کے ساتھ ضروری شواہد بھی منسلک کیے گئے۔ ان کے مطابق، چیف جسٹس یحییٰ آفریدی نے اس درخواست پر مثبت ریمارکس دیے تھے، لیکن تاحال اس پر کوئی پیش رفت نہیں ہو سکی۔

وزیراعلیٰ نے دعویٰ کیا کہ عمران خان سے ملاقات کی اجازت نہ دینا کسی "منظم رکاوٹ" یا "سیاسی سازش" کا حصہ دکھائی دیتا ہے۔

ان کا مزید کہنا تھا کہ قومی اسمبلی میں بجٹ منظوری کا عمل جاری ہے، اور پی ٹی آئی کی پارلیمانی اور بجٹ کمیٹی کو اہم فیصلوں کے لیے بانی رہنما سے براہ راست مشاورت کی ضرورت ہے۔