وزیراعظم کی ایک بارپھرتحریک انصاف کو مذاکرات کی پیشکش

 وزیراعظم شہباز شریف نے ایک بار پھر پاکستان تحریک انصاف (پی ٹی آئی) کو مذاکرات کی پیشکش کرتے ہوئے کہا ہے کہ تمام قومی مسائل کا حل صرف اور صرف بات چیت میں ہے۔

ذرائع کے مطابق، وزیراعظم کا یہ مکالمہ قومی اسمبلی میں چیئرمین پی ٹی آئی بیرسٹر گوہر علی خان سے مخصوص نشستوں پر ہونے والے فیصلے سے قبل ہوا۔ ملاقات کے دوران وزیراعظم نے از خود اٹھ کر بیرسٹر گوہر سے مصافحہ کیا اور کہا:

"بیٹھ کر بات کرتے ہیں، پہلے بھی کہا تھا کہ بیٹھ کر بات کر لیں۔ مذاکرات ہی تمام چیزوں کا حل ہیں۔"

ذرائع کے مطابق، وزیراعظم کے اس غیر رسمی مکالمے پر بیرسٹر گوہر نے مختصر جواب دیا:

"ان شاء اللہ"۔

بات چیت کا دروازہ کھلا ہے یہ بات قابل ذکر ہے کہ اس سے قبل وزیراعظم کے مشیر رانا ثنا اللہ بھی پی ٹی آئی کو مذاکرات کی پیشکش کر چکے ہیں، جس سے حکومت کی جانب سے مفاہمت کے دروازے کھلے رکھنے کا واضح عندیہ ملتا ہے۔

سیاسی مبصرین کے مطابق، وزیراعظم کی اس براہِ راست پیشکش کو جمہوری عمل کی بہتری اور سیاسی درجہ حرارت کم کرنے کی ایک اہم کوشش کے طور پر دیکھا جا رہا ہے، بالخصوص ایسے وقت میں جب ایوان میں انتخابی نشستوں پر حساس معاملات زیر غور ہیں۔