اینڈرائیڈ فونز پر جی میل استعمال کرنے والے صارفین کیلئے بہترین فیچر کا اضافہ

ویب ڈیسک:مقبول ترین ای میل سروس جی میل کو کنٹرول میں رکھنا آسان کام نہیں،ایسے متعدد صارفین ہیں جن کے ان باکس میں ہزاروں ایسی میلز موجود ہوتی ہیں جو ان ریڈ (unread) ہوتی ہیں۔

مگر اب حال ہی میں گوگل کی جانب سے متعارف کرائے جانے والا ایک نیا فیچر ایسے صارفین کے لیے مددگار ثابت ہوگا،کمپنی کی جانب سے جی میل نوٹیفکیشنز میں مارک ایز ریڈ بٹن کی آزمائش کی جا رہی ہے۔

ٹیک ویب سائٹ 9ٹو 5 گوگل کی رپورٹ میں بتایا گیا کہ یہ فیچر ابھی محدود صارفین کو اینڈرائیڈ فونز میں جی میل نوٹیفکیشنز میں دستیاب ہے۔

ایک تحقیق کے مطابق ایک جی میل صارف کو اوسطاً روزانہ 10 سے 11 ای میلز موصول ہوتی ہیں، جو کہ بظاہر بہت زیادہ تعداد نہیں، مگر جب انہیں نظر انداز کیا جائے تو بتدریج ان ریڈ ای میلز کی تعداد بڑھتی چلی جاتی ہے۔

توایسے میں مارک ایز ریڈ بٹن ایسی ہی ای میلز کے لیے ہوگا،اس سے اینڈرائیڈ فونز پر جی میل استعمال کرنے والے افراد کو بہت زیادہ فائدہ ہوگا اور ان کے لیے یہ تعین کرنا آسان ہوگا کہ کونسی ای میل کو اوپن کرکے مکمل پڑھنے کی ضرورت ہے اور کونسی پڑھے بغیر مارک ایز ریڈ کر دینی چاہیے۔

نوٹیفکیشن میں ایسا کرنے سے ان کا کافی وقت بچے گا جو جی میل ایپ یا براؤزر پر اوپن کرکے ان ای میلز کو اوپن کرنے میں لگتا۔

خیال رہے کہ آئی فون صارفین کے لیے جی میل ایپ میں یہ فیچر پہلے سے دستیاب ہے جبکہ یہ بٹن دیگر ایپس جیسے واٹس ایپ کے مارک ایز ریڈ جیسا ہی ہے۔

فی الحال یہ واضح نہیں کہ تمام صارفین کے لیے یہ فیچر کب تک متعارف کرایا جاسکتا ہے۔