لاہور میں جرائم کی شرح میں نمایاں کمی، پولیس رپورٹ

لاہور پولیس نے رواں سال کے ابتدائی چھ ماہ کے دوران شہر میں سنگین جرائم میں نمایاں کمی کا دعویٰ کیا ہے۔

تفصیلات کے مطابق پولیس کی جانب سے جاری کردہ اعداد و شمار کے مطابق 2025 کے پہلے نصف میں 12 ہزار 484 سنگین وارداتیں رپورٹ ہوئیں، جو گزشتہ برسوں کے مقابلے میں واضح کمی کو ظاہر کرتی ہیں۔

 لاہور پولیس نے 15 پر موصول ہونے والی کالز اور مقدمات کے 6 ماہ کے اعدادوشمار جاری کردیے ہیں جن کے مطابق لاہور پولیس نے جرائم کی شرح میں کمی کا نیا معیار حاصل کر لیا ہے۔

رواں سال کے پہلے 6 ماہ گذشتہ دوسالوں میں سب سے زیادہ محفوظ ثابت ہوئے ہیں، گزشتہ برس کے ابتدائی 6 ماہ میں 24 ہزار445 سنگین جرائم رپورٹ ہوئے تھے جبکہ رواں سال یہ تعداد گھٹ کر 12ہزار484 رہ گئی ہے۔

لاہور پولیس کے مطابق سال 2023 میں 39 ہزار 260 کی تعداد میں سنگین جرائم رپورٹ ہوئے تھے، رواں سال سنگین جرائم میں 2023 کے مقابلے 68 فی صد اور 2024 کے مقابلے 49 فی صد کمی آئی ہے۔

ڈی آئی جی آپریشنز فیصل کامران کے مطابق بہتر حکمت عملی بنائی اور پٹرولنگ بہتر کی، ایسی جگہوں کی نشاندہی کی جہاں جرائم ذیادہ تھے،، 35تھانوں کی حدود میں پٹرولنگ ذیادہ کی، سی سی ڈی سے بھی مدد ملی ہے ہمیں،، سیف سٹی اور ہم مل کر کام کررہے ہیں۔

شہر میں جرائم پر قابو پانے کے لیے جدید ٹیکنالوجی، انٹیلی جنس بیسڈ آپریشنز اور پٹرولنگ نظام کو مزید موثر بنایا جا رہا ہے، تاکہ شہریوں کو ایک محفوظ ماحول فراہم کیا جا سکے۔