یوکرینی حملے میں روسی بحریہ کے ڈپٹی چیف میجر جنرل گودکوف سمیت 11 اہلکار ہلاک

روس کی وزارت دفاع نے تصدیق کی ہے کہ یوکرین کے ایک حملے میں روسی بحریہ کے نائب سربراہ میجر جنرل میخائل گودکوف سمیت 11 اہلکار ہلاک ہو گئے ہیں۔

عالمی خبر رساں اداروں کے مطابق یہ حملہ روس کے علاقے کورسک میں کیا گیا، جہاں یوکرین نے ہدف بنائے گئے مقام پر شدید حملہ کیا۔ ہلاک ہونے والے میجر جنرل گودکوف یوکرین جنگ میں سرگرم کردار ادا کر رہے تھے۔

صدر ولادیمیر پیوٹن نے مارچ 2025 میں میخائل گودکوف کو بحریہ کے زمینی اور ساحلی دستوں کا ڈپٹی چیف مقرر کیا تھا۔ وہ بدنام زمانہ 155ویں بریگیڈ کے کمانڈر بھی رہ چکے تھے، جس پر یوکرین اور بین الاقوامی اداروں نے شہریوں کے قتل اور جنگی جرائم کا الزام عائد کیا ہے، خصوصاً بوچا، ایرپین اور ہوستومیل میں۔

یوکرین کی بارڈر گارڈ سروس کے مطابق، مذکورہ بریگیڈ پر یوکرینی جنگی قیدیوں کو قتل کرنے کا بھی الزام ہے۔ تاہم، روسی حکومت ان الزامات کی مسلسل تردید کرتی رہی ہے۔

روسی علاقے پر گورنر اولیگ کوژیماکو نے گودکوف کی ہلاکت کی تصدیق کرتے ہوئے انہیں "جرأت مند سپاہی" قرار دیا، جنہوں نے اپنے ساتھیوں کے ہمراہ ڈیوٹی انجام دیتے ہوئے جان دی۔

دوسری جانب، روسی بحریہ کے ایک غیر سرکاری ٹیلی گرام اکاؤنٹ پر دعویٰ کیا گیا ہے کہ اس حملے میں مزید 10 روسی فوجی اہلکار بھی ہلاک ہوئے۔

تاحال یوکرینی حکام کی جانب سے اس حملے پر کوئی سرکاری ردعمل یا تبصرہ سامنے نہیں آیا۔