ماسکو کی جانب یوکرینی ڈرون حملہ ناکام، روسی فضائی دفاع نے 94 ڈرونز تباہ کر دیے

روس کے دارالحکومت ماسکو کی جانب آنے والے یوکرینی ڈرونز کو روسی فضائی دفاعی نظام نے ہفتے کے روز کامیابی سے مار گرایا، جس کے نتیجے میں شہر کے ایک مرکزی ہوائی اڈے پر عارضی طور پر پروازوں کی آمد و رفت روک دی گئی۔

خبر رساں ادارے روئٹرز کے مطابق، ماسکو کے میئر سرگئی سوبیانین نے بتایا کہ ہنگامی سروسز ان تمام مقامات پر کارروائی میں مصروف ہیں جہاں ڈرونز کو گرایا گیا، تاہم نقصانات یا جانی نقصان سے متعلق کوئی تفصیلات فراہم نہیں کی گئیں۔

ادھر روسی وزارتِ دفاع کا کہنا ہے کہ ہفتے کی شب ملک بھر میں مجموعی طور پر 94 ڈرونز کو تباہ کیا گیا۔ اس کے علاوہ صبح 8 بجے سے دوپہر 1:50 بجے (ماسکو وقت) کے دوران مزید 45 ڈرونز کو فضا میں ہی مار گرایا گیا۔

یہ ڈرون حملے ایسے وقت میں ہو رہے ہیں جب روس اور یوکرین کے درمیان جاری تنازع میں فضائی حملوں کا سلسلہ تیز ہوتا جا رہا ہے، اور دونوں ممالک ایک دوسرے کے اسٹریٹجک مقامات کو نشانہ بنانے کی کوشش کر رہے ہیں۔