ایران اپناانتہائی افزودہ یورینیم امریکا کے حوالے کرنے پر راضی ہو گیا ،نیویارک ٹائمز کا دعویٰ

واشنگٹن ڈی سی:امریکی اخبار نیویارک ٹائمز نے حکام کے حوالےسے دعویٰ کرتے ہوئے کہا ہے کہ ایران ،امریکہ اور مغرب کے ساتھ جاری کشیدگی کے خاتمے اور امن معاہدے کے تحت اپنے انتہائی افزودہ یورینیم کے ذخیرے سے دستبردار ہونے پر آمادہ ہو گیا ہے۔

اخبار کے مطابق دو امریکی حکام نے دعویٰ کیا ہے کہ ایران نے معاہدے کے مسودے میں اپنے انتہائی افزودہ یورینیم کے ذخیرے کو ترک کرنے کی اہم شق کو تسلیم کرلیا ہے۔

میڈیا رپورٹس کے مطابق امریکی حکام نے کہا کہ تاہم اس تجویز سے یہ مسئلہ طے نہیں ہوتا کہ ایران اپنے ذخیرے کو کس طرح ترک کرے گا۔ یہی وجہ ہے کہ ایران کے جوہری پروگرام پر مذاکرات کے آنے والے دور میں کچھ تفصیلات کو روک دیا گیا ہے۔

تاہم عہدیداروں کا کہنا ہے کہ ایران ایسا کرنے کا عہد کرے گا اور یہ امریکا کا ایک دیرینہ ہدف ہے اور اس معاہدے کے لیے اہم ہے۔

دوسری جانب ایران نے ٹرمپ کے اعلان کردہ معاہدے کی شرائط پر توثیق یا تردید کے حوالے سے فی الحال کوئی بیان نہیں دیا ہے۔تاہم چند روز قبل ایرانی سپریم لیڈر مجتبیٰ خامنہ ای کی جانب سے جاری بیان میں ایرانی حکام کو سخت ہدایات کی گئی تھیں کہ وہ کسی بھی صورت افزودہ یورنیئیم کو ملک سے باہر نہ بھیجیں۔

خیال رہے کہ یہ پیش رفت ایسے وقت میں سامنے آئی جب امریکی صدر ڈونلڈ ٹرمپ نے اعلان کیا کہ واشنگٹن اور تہران ایک ایسے معاہدے کو حتمی شکل دینے کے قریب ہیں جس کا مقصد جنگی کشیدگی ختم کرنا اور آبنائے ہرمز کو دوبارہ کھولنا ہے۔