بلوچستان: 1500 فلاحی تنظیموں کی رجسٹریشن منسوخ

کوئٹہ : بلوچستان چیرٹیز اینڈ ریگولیشن اتھارٹی نے صوبے بھر میں محکمہ سماجی بہبود میں رجسٹرڈ تمام 1500 فلاحی تنظیموں، مدارس، مساجد، فاؤنڈیشنز، یونینز اور کمیونٹی آرگنائزیشنز کی رجسٹریشن منسوخ کر دی ہے۔

ڈائریکٹر جنرل سلیم کھوسہ کے مطابق اب ان تمام اداروں کو 31 جولائی 2025 تک دوبارہ چیرٹیز اینڈ ریگولیشن اتھارٹی میں رجسٹریشن کروانا ہو گا، بصورتِ دیگر ان کے خلاف قانونی کارروائی کی جائے گی۔

انہوں نے واضح کیا کہ رجسٹریشن کے بغیر فنڈز جمع کرنے یا سرگرمیاں جاری رکھنے والے اداروں کے خلاف کارروائی کا اختیار ڈپٹی کمشنرز کو دے دیا گیا ہے۔

خلاف ورزی پر متعلقہ افراد کو ایک سال قید، 20 لاکھ روپے جرمانہ یا دونوں سزائیں دی جا سکتی ہیں۔

یہ اقدام ممکنہ طور پر فلاحی شعبے میں شفافیت، فنڈز کی نگرانی اور سکیورٹی خدشات کے تناظر میں اُٹھایا گیا ہے۔