مالاکنڈ ڈویژن میں تجاوزات کے خلاف بڑا آپریشن، 162 کنال زمین واگزار، درجنوں عمارتیں سیل اور مسمار

مالاکنڈ ڈویژن میں تجاوزات کے خلاف جاری آپریشن کے دوران اب تک 162 کنال سے زائد اراضی واگزار کرائی جا چکی ہے، جب کہ درجنوں غیر قانونی عمارتیں سیل اور مسمار کر دی گئی ہیں۔

سانحہ سوات کے بعد شروع کی گئی اس مہم کی تازہ رپورٹ صوبائی حکومت کو ارسال کر دی گئی ہے، جس میں بڑے پیمانے پر غیر قانونی قبضوں کی نشاندہی کی گئی ہے۔

رپورٹ کے مطابق، مالاکنڈ ڈویژن کے چھ اضلاع میں مجموعی طور پر 501 کنال زمین پر تجاوزات پائی گئیں، جن میں صرف سوات میں 203 کنال اراضی غیر قانونی قبضے میں تھی۔

آپریشن کے دوران سوات میں ایک عمارت کو سیل کیا گیا، جبکہ 20 کنال سے زائد رقبے پر بنی غیر قانونی تعمیرات کو گرایا گیا۔ سوات میں مجموعی طور پر 78 کنال زمین کو تجاوزات سے پاک کیا گیا، اور 8 کلومیٹر طویل علاقے کی حد بندی مکمل کی گئی۔

دیگر اضلاع کی صورتحال کچھ یوں ہے:

اپر دیر: 10 عمارتیں سیل ، لوئر دیر: 22 عمارتیں سیل ، ضلع مالاکنڈ: 4 عمارتیں سیل ، بونیر: 9 عمارتیں سیل ، باجوڑ: 15 عمارتیں سیل کر دی گئیں ہیں ۔ 

رپورٹ کے مطابق اب تک ڈویژن بھر میں 75 کنال سے زائد رقبے پر قائم غیر قانونی تعمیرات مسمار کی گئی ہیں، جبکہ 115 کلومیٹر علاقے کی حد بندی مکمل ہو چکی ہے، اور 54 مقامات پر باڑ بھی نصب کر دی گئی ہے۔

اس حوالے سے کمشنر مالاکنڈ ڈویژن عابد وزیر نے جیو نیوز سے گفتگو میں بتایا کہ بلا تفریق تجاوزات کے خلاف کارروائیاں جاری ہیں۔ ان کا کہنا تھا کہ وزیراعلیٰ خیبرپختونخوا کی واضح ہدایت ہے کہ کسی کو رعایت نہ دی جائے اور قانون کی مکمل عملداری کو یقینی بنایا جائے۔