برکس اجلاس میں بھارت کو سفارتی جھٹکا، پاکستان مخالف موقف کو پذیرائی نہ مل سکی

برازیل میں منعقدہ برکس سربراہی اجلاس کے دوران بھارت کو سفارتی محاذ پر واضح ناکامی کا سامنا کرنا پڑا، جہاں اس کی بھرپور کوششوں کے باوجود اجلاس کے اعلامیے میں پاکستان کے خلاف کوئی ذکر شامل نہ کیا جا سکا۔

ذرائع کے مطابق، برکس اعلامیے میں پہلگام واقعے کی مذمت تو کی گئی، تاہم بھارت کی جانب سے اس واقعے کے تناظر میں پاکستان کو موردِ الزام ٹھہرانے کی کوشش کو رکن ممالک کی حمایت حاصل نہ ہو سکی۔

مزید برآں، مبصرین کا کہنا ہے کہ چین کے صدر نے 2012 کے بعد پہلی مرتبہ برکس اجلاس میں شرکت نہیں کی، جو بھارتی موقف سے دوری کا اشارہ تصور کیا جا رہا ہے۔ اس کے ساتھ ساتھ، روسی صدر ولادیمیر پیوٹن نے بھی اجلاس میں محض ویڈیو لنک کے ذریعے شرکت کی، جو بڑی طاقتوں کے محتاط رویے کو ظاہر کرتا ہے۔

بین الاقوامی سطح پر یہ صورتحال بھارت کے لیے ایک سفارتی دھچکہ سمجھی جا رہی ہے، جو طویل عرصے سے پاکستان کو دہشت گردی کے ساتھ جوڑنے کی کوشش کرتا آیا ہے۔ تاہم اس بار، برکس جیسے اہم پلیٹ فارم پر اس کا بیانیہ جگہ نہ پا سکا۔