فیصل آباد میں اربوں روپے کا آن لائن مالیاتی فراڈ بے نقاب، 149 افراد گرفتار

نیشنل سائبر کرائم انویسٹی گیشن ایجنسی (NCCIA) نے فیصل آباد میں بڑی کارروائی کرتے ہوئے اربوں روپے کے آن لائن مالیاتی فراڈ میں ملوث ایک منظم نیٹ ورک کو بے نقاب کر دیا ہے۔

ترجمان NCCIA کے مطابق، یہ کارروائی سابق چیئرمین فیسکو کی رہائش گاہ پر کی گئی، جہاں ایک خفیہ کال سینٹر قائم کیا گیا تھا۔ اس کال سینٹر کے ذریعے شہریوں کو مختلف طریقوں سے دھوکہ دے کر بھاری رقوم وصول کی جا رہی تھیں۔

آپریشن کے دوران 149 افراد کو گرفتار کیا گیا، جن میں 131 مرد اور 18 خواتین شامل ہیں۔ گرفتار شدگان میں ملکی اور غیر ملکی افراد بھی شامل ہیں۔

ترجمان کے مطابق ملزمان مختلف نوعیت کے مالیاتی جرائم، آن لائن دھوکا دہی اور پونزی اسکیمز میں ملوث پائے گئے۔ وہ لوگوں کو سرمایہ کاری پر غیر معمولی منافع کا جھانسہ دے کر رقم ہتھیاتے تھے۔

ایجنسی کے مطابق کارروائی کے دوران بھاری مقدار میں شواہد، ڈیجیٹل آلات، اور مالیاتی ریکارڈ بھی قبضے میں لیا گیا ہے، جبکہ مزید تفتیش جاری ہے۔