بحیرہ احمر میں حوثیوں کا بحری جہاز پر حملہ، 'میجک سیز' کو سمندر میں غرق کرنے کی ویڈیو جاری

صنعا: یمن کے حوثی گروپ نے بحیرہ احمر میں اسرائیل سے منسلک ایک مال بردار جہاز پر حملے کی ویڈیو جاری کر دی ہے، جس میں ’میجک سیز‘ نامی بحری جہاز کو نشانہ بنا کر سمندر برد کرنے کے مناظر دکھائے گئے ہیں۔

ویڈیو میں دیکھا جا سکتا ہے کہ حملے سے قبل حوثیوں کی جانب سے جہاز کے کپتان کو بارہا رفتار کم کرنے کا انتباہ دیا گیا۔ تاہم، وارننگ کو نظرانداز کیے جانے کے بعد موٹر بوٹس کے ذریعے جہاز پر حملہ کیا گیا اور یمنی بحریہ کے اہلکاروں نے اس پر قبضہ کر لیا۔

بعد ازاں ویڈیو میں بیک وقت کئی دھماکوں کی آوازیں سنائی دیتی ہیں، جن کے بعد جہاز مکمل طور پر غرق ہو جاتا ہے۔

یاد رہے کہ گزشتہ روز حوثی ترجمان کی جانب سے تصدیق کی گئی تھی کہ 'میجک سیز' اسرائیل کے لیے رواں دواں تھا اور اس نے انصار اللہ کی جانب سے مقبوضہ فلسطینی بندرگاہوں میں داخلے پر عائد پابندی کی خلاف ورزی کی تھی۔

ترجمان نے واضح کیا تھا کہ جب تک اسرائیلی جارحیت جاری ہے، فلسطینیوں کی حمایت میں ایسے اقدامات جاری رہیں گے، اور اسرائیل سے وابستہ کسی بھی بحری جہاز کو نشانہ بنانے سے گریز نہیں کیا جائے گا۔