صدر زرداری کے استعفے کی خبریں بے بنیاد اور جمہوریت مخالف سازش ہیں، شیری رحمٰن

پاکستان پیپلز پارٹی کی نائب صدر اور سینیٹر شیری رحمٰن نے صدر آصف علی زرداری کے استعفیٰ سے متعلق افواہوں کو سختی سے مسترد کرتے ہوئے انہیں گمراہ کن، بے بنیاد اور جمہوری نظام کے خلاف ایک سوچی سمجھی سازش قرار دیا ہے۔

اپنے بیان میں شیری رحمٰن کا کہنا تھا کہ "یہ افواہیں ایک منظم مہم کا حصہ ہیں، جن کا مقصد جمہوری نظام کو کمزور کرنا اور عوام میں غیر یقینی کی فضا پیدا کرنا ہے۔"

انہوں نے عوام سے اپیل کی کہ وہ ایسے منفی پروپیگنڈے اور جعلی خبروں کا حصہ نہ بنیں، اور سیاسی شعور کا مظاہرہ کرتے ہوئے ان افواہوں کو مسترد کریں۔

شیری رحمٰن نے صدر آصف علی زرداری کی جمہوری خدمات کو خراجِ تحسین پیش کرتے ہوئے کہا کہ "انہوں نے ہر نازک مرحلے پر جمہوریت کا علم بلند رکھا، وہ آئینی بالادستی اور جمہوری استحکام کی علامت ہیں۔"

ان کا مزید کہنا تھا کہ صدر زرداری نے اپنی سیاسی حکمت عملی کے تحت تمام آئینی اختیارات پارلیمان کو منتقل کیے، جس سے پارلیمانی جمہوریت کو تقویت ملی۔

شیری رحمٰن نے زور دیتے ہوئے کہا، "آج صدر زرداری اتحادی حکومت کے استحکام کا اہم ستون ہیں۔ انہوں نے ہمیشہ ذاتی مفاد کو قومی مفاد پر قربان کیا، اور ان کی موجودگی آئینی تسلسل اور جمہوری اداروں کی بقا کی ضمانت ہے۔"