آئی سی سی ون ڈے رینکنگ جاری: شبمن گل سرفہرست، بابر اعظم دوسرے نمبر پر برقرار

انٹرنیشنل کرکٹ کونسل (آئی سی سی) نے تازہ ترین ون ڈے پلیئرز رینکنگ جاری کر دی ہے، جس میں بیٹرز، بولرز اور آل راؤنڈرز کی عالمی درجہ بندی شامل ہے۔

بیٹنگ کی درجہ بندی میں بھارت کے شبمن گل بدستور پہلے نمبر پر فائز ہیں، جبکہ پاکستان کے سابق کپتان بابر اعظم نے بھی اپنی دوسری پوزیشن برقرار رکھی ہے۔ بھارتی کپتان روہت شرما تیسرے نمبر پر موجود ہیں۔

سری لنکا کے چریتھ اسالانکا نے چھٹی پوزیشن حاصل کی ہے، جبکہ کوشال مینڈس نے 10 درجے بہتری کے ساتھ ٹاپ 10 میں جگہ بناتے ہوئے دسویں نمبر پر جگہ بنا لی ہے۔

بولنگ رینکنگ میں سری لنکن اسپنر مہیش تھیکشانا پہلی پوزیشن پر براجمان ہیں۔ ان کے ہم وطن وانندو ہسارانگا نے شاندار کارکردگی کے باعث 11 درجے ترقی حاصل کرتے ہوئے آٹھویں پوزیشن پر جگہ بنا لی، جبکہ بھارت کے رویندرا جڈیجہ ایک درجہ نیچے آ کر نویں نمبر پر آ گئے ہیں۔

پاکستان کے فاسٹ بولر شاہین شاہ آفریدی ایک درجہ تنزلی کے بعد بارہویں نمبر پر پہنچ چکے ہیں۔

آل راؤنڈرز کی فہرست میں افغانستان کے عظمت اللہ عمرزئی نے اپنی پہلی پوزیشن برقرار رکھی ہے۔ تاہم ٹاپ 10 آل راؤنڈرز میں پاکستان کا کوئی کھلاڑی شامل نہیں۔