پی ٹی آئی تحریک پر سوالات: عالیہ حمزہ کا لاعلمی کا اظہار، قیادت سے وضاحت طلب

پاکستان تحریک انصاف (پی ٹی آئی) پنجاب کی چیف آرگنائزر عالیہ حمزہ ملک نے پارٹی کی جاری سیاسی حکمت عملی اور عمران خان کی رہائی سے متعلق تحریک کے لائحہ عمل پر لاعلمی کا اظہار کیا ہے۔

سماجی رابطے کی ویب سائٹ ’ایکس‘ پر اپنے پیغام میں عالیہ حمزہ نے کہا کہ انہیں صرف غیر رسمی ذرائع سے اطلاع ملی ہے کہ عمران خان کی رہائی کے لیے کسی تحریک یا منصوبہ بندی کا اعلان کیا گیا ہے، لیکن اس بارے میں انہیں باضابطہ طور پر کوئی اطلاع نہیں دی گئی۔

انہوں نے اپنی پوسٹ میں پارٹی قیادت سے استفسار کیا کہ تحریک کب، کہاں سے، اور کس حکمتِ عملی کے تحت شروع کی جائے گی؟ انہوں نے یہ سوال بھی اٹھایا کہ 5 اگست کی ڈیڈ لائن کے بعد اچانک 90 دن کا منصوبہ کیسے سامنے آ گیا؟ اور کیا کوئی اس کی وضاحت کرے گا؟

واضح رہے کہ گزشتہ رات خیبرپختونخوا کے وزیراعلیٰ علی امین گنڈاپور نے پی ٹی آئی چیئرمین بیرسٹر گوہر علی خان اور دیگر مرکزی رہنماؤں کی موجودگی میں ایک تقریب کے دوران اعلان کیا تھا کہ پارٹی نے حکومت کو 90 روز کا الٹی میٹم دے دیا ہے۔ اگر اس مدت میں عمران خان کو رہا نہ کیا گیا تو پارٹی کی تحریک مزید سخت رخ اختیار کرے گی۔

تاہم اس اہم موقع پر عالیہ حمزہ کو مدعو نہیں کیا گیا، جس پر انہوں نے سوشل میڈیا پر شکوہ کرتے ہوئے کہا کہ بطور چیف آرگنائزر پنجاب، انہیں نظر انداز کرنا باعث حیرت ہے۔

علی امین گنڈاپور نے اپنے خطاب میں یہ بھی کہا کہ عمران خان کی رہائی کے لیے تحریک کا آغاز لاہور سے ہو چکا ہے اور یہ تحریک 5 اگست تک اپنے عروج پر پہنچے گی۔ انہوں نے اس مرحلے کو فیصلہ کن قرار دیتے ہوئے کہا: "اب آر یا پار ہوگا۔"

وزیراعلیٰ نے مزید کہا کہ عمران خان نے قوم کو شعور دیا، ملکی خودمختاری کی بات کی، اور وہ آج بھی پاکستان کے مفاد میں بات چیت کے لیے تیار ہیں۔