پاکستان، ازبکستان کے وزرائے خارجہ کا رابطہ؛ ریلوے منصوبے اور علاقائی تعاون پر گفتگو

وزیر خارجہ اسحٰق ڈار نے ازبکستان کے وزیر خارجہ بختیار سعیدوف سے ٹیلیفونک رابطہ کیا، جس میں پاکستان-افغانستان-ازبکستان ریلوے منصوبے کے فریم ورک پر تفصیلی تبادلہ خیال کیا گیا۔

ترجمان دفتر خارجہ کے مطابق، دونوں وزرائے خارجہ نے اس اسٹریٹیجک منصوبے کی تازہ پیش رفت اور مستقبل میں ممکنہ تعاون کے امکانات پر گفتگو کی۔ اس کے ساتھ ساتھ، اس بات پر بھی اتفاق کیا گیا کہ آئندہ ملاقات شنگھائی تعاون تنظیم (SCO) کی وزرائے خارجہ کونسل کے اجلاس کے موقع پر چین میں کی جائے گی۔

ترجمان کے مطابق، ایس سی او وزرائے خارجہ کونسل کا اجلاس 15 جولائی کو چین کے شہر تیانجن میں منعقد ہوگا، جس میں رکن ممالک کے وزرائے خارجہ اور تنظیم کے مستقل اداروں کے سربراہان شرکت کریں گے۔

چینی وزارت خارجہ کے مطابق، یہ اجلاس کمیونسٹ پارٹی آف چائنا (CPC) کی مرکزی کمیٹی کے پولیٹیکل بیورو کے رکن اور چینی وزیر خارجہ وانگ ای کی دعوت پر ہو رہا ہے۔

اجلاس میں رکن ممالک کے درمیان باہمی تعاون، علاقائی روابط، اور اہم بین الاقوامی امور پر غور کیا جائے گا۔ اس دوران بھارتی وزیر خارجہ سبرامنیم جے شنکر بھی چین کا دورہ کریں گے اور اجلاس میں شرکت کریں گے۔