کراچی: سی ٹی ڈی اور خفیہ ایجنسی کی مشترکہ کارروائی ، کالعدم ٹی ٹی پی کے 2 دہشتگرد ہلاک

کراچی : محکمہ انسداد د ہشتگردی(سی ٹی ڈی) اور ایک خفیہ ایجنسی کی مشترکہ کارروائی میںکالعدم تحریک طالبان پاکستان ( ٹی ٹی پی) کے دو دہشتگرد ہلاک ہوگئے، ان کے قبضے سےخودکش جیکٹ اور اسلحہ برآمد کیا گیا۔

ترجمان سی ٹی ڈی کے مطابق جمعرات کو حب ریور روڈ پر مشترکہ کارروائی کے دوران کالعدم تحریک طالبان پاکستان (ٹی ٹی پی) سے تعلق رکھنے والے دو مشتبہ عسکریت پسندوں کو ہلاک کر دیا گیا۔

ترجمان نے بتایا کہ موچکو تھانے کی حدود میں ’فتنہ الخوارج‘ سے تعلق رکھنے والے دہشت گردوں کی موجودگی پر آسکانی محلے میں کارروائی کی گئی جس دوران فائرنگ کے تبادلے میں دو مبینہ دہشت گرد مارے گئے۔

ترجمان سی ٹی ڈی کے مطابق مارے جانے والوں دہشتگردوںکے قبضے سے ایک خودکش جیکٹ، ایک کلاشنکوف، ایک پستول اور بارودی مواد برآمد ہوا۔

ترجمان نے مزید بتایا کہ بم ڈسپوزل اسکواڈ نے خودکش جیکٹ کو ناکارہ بنا دیا، جبکہ لاشوں کو قانونی کارروائی کے لیے سول اسپتال کراچی منتقل کر دیا گیا، جہاں فوری طور پر ان کی شناخت نہیں ہو سکی۔