پنجاب اسمبلی: معطل اپوزیشن ارکان کے خلاف ریفرنس ختم کرنے کا فیصلہ

پنجاب اسمبلی میں اپوزیشن کے 26 معطل ارکان کے معاملے پر حکومت اور اپوزیشن کے درمیان مذاکرات کامیاب ہوگئے۔ سپیکر پنجاب اسمبلی ملک احمد خان نے ان ارکان کے خلاف دائر ریفرنسز واپس لینے کا فیصلہ کرلیا ہے۔

اسمبلی ذرائع کے مطابق، سپیکر کی ہدایت پر ریفرنس واپس لینے کا مسودہ تیار کرلیا گیا ہے، جو اُن کی منظوری کے بعد باضابطہ طور پر جاری کردیا جائے گا۔

یاد رہے کہ حکومتی ارکان احمد اقبال، میاں مجتبیٰ شجاع الرحمن اور افتخار احمد چھاچھر نے معطل ارکان کے خلاف ریفرنس دائر کرنے کی درخواستیں دی تھیں، جو الیکشن کمیشن کو بھیجی جانی تھیں۔

ذرائع کا کہنا ہے کہ معطل ارکان کی بحالی کا عمل سپیکر کی بیرونِ ملک واپسی کے بعد شروع ہوگا۔ فریقین کے درمیان طے پانے والے معاہدے میں یہ شق بھی شامل ہے کہ معطل ارکان کو ان کے عہدوں پر بحال کیا جائے گا۔