1122 کا کامیاب آپریشن: معذور خاتون سمیت 7 افراد بحفاظت ریسکیو

ریسکیو 1122 منڈی بہاوالدین نے 4 گھنٹے طویل ریسکیو آپریشن کے بعد ایک معذور خاتون اور اس کے چھ اہل خانہ کو محفوظ مقام پر منتقل کر دیا۔ متاثرہ خاندان کو شدید مشکلات کے باعث تقریباً 5 کلومیٹر پیدل سفر کے ذریعے ریسکیو کیا گیا۔

سیکرٹری ایمرجنسی سروسز ڈاکٹر رضوان نصیر کی جانب سے ریسکیورز کو زبردست خراجِ تحسین پیش کیا گیا ۔ 

ریسکیو ٹیم نے نشیبی علاقے گاؤں نکی، ضلع جہلم کے نواحی ڈیرے پر پھنسے خاندان تک رسائی حاصل کی۔ 22 سالہ معذور خاتون سدرہ دختر غلام حسین جسمانی اور ذہنی معذوری کے باعث نقل و حرکت سے قاصر تھی، جبکہ اہل خانہ پانی کے بڑھتے ہوئے بہاؤ کی وجہ سے مکمل طور پر محصور ہو چکے تھے۔

مشکل جغرافیائی حالات اور ناقابلِ رسائی لوکیشن کے باعث ہیلی کاپٹر یا کشتی کے ذریعے ریسکیو ممکن نہ تھا۔ اس صورتِ حال میں ریسکیو ٹیم نے صبح 8:30 بجے غیر روایتی مگر پیشہ ورانہ انداز میں آپریشن کا آغاز کیا۔ جی پی ایس کی مدد سے لوکیشن ٹریس کی گئی اور کیچڑ و پانی سے بھرے راستے عبور کرتے ہوئے ٹیم نے 5 کلومیٹر سے زائد کا فاصلہ پیدل طے کیا۔

محصور خاتون جو ڈیرے کے فرسٹ فلور پر موجود تھی، کو نہ صرف حفاظت سے نیچے اتارا گیا بلکہ اسے چارپائی پر کندھوں پر اٹھا کر یہ طویل فاصلہ طے کیا گیا۔ اہل خانہ کو بھی لائف جیکٹس فراہم کر کے ریسکیو عملے کی نگرانی میں بحفاظت محفوظ مقام پر منتقل کیا گیا۔

یہ مشکل ترین ریسکیو آپریشن ڈسٹرکٹ ایمرجنسی آفیسر انجینئر عمران خان کی قیادت میں 11:40 بجے، جمعہ سے قبل، کامیابی سے مکمل کیا گیا۔