اسلام آباد میں چینی کے سرکاری نرخ مقرر، گراں فروشی پر سخت کارروائی کا اعلان

اسلام آباد انتظامیہ نے چینی کی قیمتوں کو کنٹرول کرنے کے لیے ریٹیل نرخ 172 روپے فی کلو مقرر کر دیا ہے، جبکہ ایکس مل قیمت 165 روپے فی کلو ہوگی۔ سرکاری نوٹیفکیشن میں واضح کیا گیا ہے کہ مقررہ قیمت سے تجاوز کرنے والوں کے خلاف سخت قانونی کارروائی کی جائے گی۔

ڈپٹی کمشنر اسلام آباد نے متعلقہ اداروں کو فوری کریک ڈاؤن کی ہدایت جاری کرتے ہوئے عوام سے اپیل کی ہے کہ چینی کی خریداری کے دوران سرکاری ریٹ لسٹ کو مدنظر رکھیں اور گراں فروشی کی اطلاع متعلقہ حکام کو دیں۔

دوسری جانب، پنجاب حکومت نے بھی آئندہ چار ماہ کے لیے چینی کے نرخ مقرر کر دیے ہیں۔ 15 اکتوبر کے بعد صوبے میں چینی کی ایکس مل قیمت 171 روپے جبکہ ریٹیل قیمت 179 روپے فی کلو مقرر کی گئی ہے۔

ادھر کوئٹہ میں چینی کی قیمتوں میں کمی نہ آ سکی۔ رواں ماہ 10 روپے اضافے کے بعد شہر میں چینی فی کلو 190 روپے اور نواحی علاقوں میں 195 روپے تک فروخت ہو رہی ہے۔ ہول سیل مارکیٹ میں چینی 183 روپے فی کلو کے نرخ پر دستیاب ہے۔

چینی کی بڑھتی ہوئی قیمتوں پر شہریوں نے تشویش کا اظہار کیا ہے جبکہ ڈیلرز نے آئندہ دنوں میں مزید اضافے کا خدشہ ظاہر کیا ہے۔