حکومت بیروزگار افراد کو الیکٹرک رکشے اور لوڈر فراہم کرے گی: وزیراعظم شہباز شریف

اسلام آباد : وزیراعظم شہباز شریف نے اعلان کیا ہے کہ حکومت بیروزگار افراد کو روزگار کی فراہمی کے لیے الیکٹرک رکشے اور لوڈر گاڑیاں فراہم کرے گی۔ ان خیالات کا اظہار انہوں نے الیکٹرک وہیکلز سے متعلق حکومتی معاونت پر جائزہ اجلاس کی صدارت کرتے ہوئے کیا۔

وزیراعظم نے کہا کہ "الیکٹرک گاڑیوں کے فروغ سے نہ صرف ماحولیاتی تحفظ ممکن ہوگا بلکہ ایندھن کی درآمد پر قیمتی زرمبادلہ کی بچت بھی ہوگی۔ اس کے ساتھ ساتھ مقامی صنعت کو فروغ دینے میں بھی مدد ملے گی۔"

 عام آدمی کی رسائی، کمزور طبقے کو ترجیح : 
وزیراعظم نے ہدایت کی کہ الیکٹرک وہیکلز تک عام آدمی کی رسائی کو ممکن بنانے کے لیے جامع لائحہ عمل تیار کیا جائے، جبکہ معاشی طور پر کمزور افراد کو ترجیح دی جائے۔

انہوں نے متعلقہ حکام کو یہ بھی حکم دیا کہ الیکٹرک گاڑیوں کی تیاری اور مرمت کے لیے مکمل ایکوسسٹم تشکیل دیا جائے اور اسکیم کی تھرڈ پارٹی ویلیڈیشن کرائی جائے تاکہ شفافیت برقرار رہے۔

 ٹاپرز کے لیے الیکٹرک بائیک : 
وزیراعظم نے اعلان کیا کہ وفاقی حکومت اور تمام بورڈز کے ٹاپر طلبہ کو الیکٹرک بائیکس دی جائیں گی تاکہ وہ تعلیمی میدان میں مزید ترقی کریں اور دیگر طلبہ کے لیے مثال بن سکیں۔

عوامی آگاہی مہم کی ہدایت : 
انہوں نے حکومتی معاونت سے متعلق عوامی آگاہی مہم شروع کرنے کی ہدایت کی تاکہ زیادہ سے زیادہ لوگ اس اسکیم سے فائدہ اٹھا سکیں۔