گلستانِ جوہر میں 43 عمارتیں خطرناک قرار، تکنیکی رپورٹ طلب

کراچی کے علاقے گلستانِ جوہر میں 43 رہائشی عمارتوں کو خطرناک قرار دے دیا گیا ہے۔ یہ عمارتیں علاقے کے مختلف بلاکس میں واقع ہیں، جہاں سینکڑوں فلیٹس میں ہزاروں افراد اپنے اہل خانہ کے ساتھ مقیم ہیں۔

معاملے پر ردعمل دیتے ہوئے ایسوسی ایشن آف بلڈرز اینڈ ڈویلپرز (آباد) کے چیئرمین حسن بخشی نے کہا ہے کہ ان عمارتوں سے متعلق مکمل تکنیکی سروے رپورٹ آباد کو فراہم کی جائے تاکہ حقائق پر مبنی فیصلہ کیا جا سکے۔

انہوں نے زور دیا کہ کسی بھی عمارت کو صرف ظاہری مشاہدے کی بنیاد پر ناقابلِ رہائش قرار دینا مناسب نہیں، بلکہ اس کے لیے مخصوص انجینئرنگ ٹولز کے ذریعے فنی جانچ ضروری ہے۔ بخشی نے کہا کہ آباد ماہرین کی رائے اور حقائق کی روشنی میں ہی کوئی مؤقف اپنائے گی۔

اس پیش رفت نے ان عمارتوں میں مقیم مکینوں میں شدید تشویش پیدا کر دی ہے، جو اب اپنی رہائش اور مستقبل کے حوالے سے غیر یقینی صورت حال سے دوچار ہیں۔