حالیہ بارشوں سے کتنی ہلاکتیں ہوئیں؟ این ڈی ایم اے نے رپورٹ جاری کر دی

اسلام آباد: نیشنل ڈیزاسٹر منیجمنٹ اتھارٹی (این ڈی ایم اے) نے حالیہ مون سون بارشوںکے دوران ہلاکتوں کی تعداد کے حوالے سے رپورٹ جاری کر دی۔ 

این ڈی ایم اےکے مطابق گزشتہ 24 گھنٹوں میں 12 افراد پنجاب اور ایک خیبرپختونخوا میں جاں بحق ہوا جن میں 4 بچے اور 3 خواتین شامل ہیں،جس کے بعد 26 جون سے 20 جولائی تک ہلاکتوں کی مجموعی تعداد 216 ہوگئی۔

رپورٹ کے مطابق مون سون کے دوران پنجاب میں سب سے زیادہ 135 اموات ہوئیں، خیبر پختونخوا میں 42، سندھ میں 21، بلوچستان میں 16 جبکہ اسلام آباد اور آزاد کشمیر میں ایک ، ایک ہلاکت رپورٹ ہوئی۔

این ڈی ایم اے کی جانب سے جاری کر دہ رپورٹ کے مطابق اب تک بارشوں سےجاں بحق افراد میں 75 مرد، 40 خواتین اور 101 بچے شامل ہیں۔

این ڈی ایم اے کا کہنا ہے کہ گزشتہ 24 گھنٹوں میں مزید 20 افراد زخمی ہوئی اور اب تک مجموعی طور پر 582 افراد زخمی ہوچکے۔

جبکہ گزشتہ 24 گھنٹوں کے دوران پنجاب میں 16، گلگت میں 3 اور آزاد جموں کشمیر میں ایک شہری زخمی ہوا،زخمی ہونے والوں میں 227 مرد، 163 خواتین اور 192 بچے شامل ہیں۔

رپورٹ کے مطابق زیادہ تر اموات گھر گرنے، سیلاب، بجلی گرنے، لینڈ سلائیڈنگ اور ڈوبنے سے ہوئیں،جبکہ 26 جون سے 20 جولائی تک 779 گھر تباہ اور 195 جانور ہلاک ہوئے۔