سینیٹ الیکشن : علی امین سے ملاقات کے بعد ناراض امیدوار کا کاغذات نامزدگی واپس لینے کا اعلان

پشاور: خیبرپختونخوا میں سینیٹ  کی نشستوں پر ہونے والے الیکشن کے تنازع کو پی ٹی آئی کی قیادت نے حل کرلیا ہے جس کے بعد تحریک انصاف کے ناراض امیدواروں نے کاغذات واپسی لینا شروع کردیے۔

تفصیلات کے مطابق وزیراعلیٰ خیبرپختونخوا علی امین گنڈاپور نے حکومت کے ساتھ طےپانے والے فارمولے کےتحت بلامقابلہ انتخاب کےلیےکوششیں تیز کردی ہیں۔

علی امین گنڈاپور نے عرفان سلیم اوردیگر ناراض امیدواروں سے رابطے کیے ہیں اور ان سے کاغذات نامزدگی واپس لینےکے حوالے سے گفتگو کی جس کے بعد ناراض امیدوار وقاص اورکزئی نے کاغذات نامزدگی واپس لینےکا اعلان کردیا۔

علی امین گنڈاپور کا کہنا تھا کہ امیدواروں کی فہرست بانی پی ٹی آئی کی ہدایات کےمطابق تیار کی گئی ہے، وقاص اورکزئی کا کاغذات نامزدگی واپس لینے پر شکرگزارہوں۔

انہوں نے مزید کہا کہ وقاص اورکزئی نے ذاتی مفاد کو نہیں بانی چیئرمین کے حکم کو دیکھا اور دستبردار ہوگئے۔

علی امین گنڈا پور کا کہنا تھا کہ بانی چیئرمین نے نظام سے ٹکر لی ہے۔