نور مقدم قتل کیس: ظاہر جعفر نے سزائے موت کے خلاف سپریم کورٹ سے رجوع کر لیا

نور مقدم قتل کیس میں سزائے موت پانے والے مجرم ظاہر جعفر نے اپنے خلاف دی گئی سزا کے فیصلے پر نظرثانی کے لیے سپریم کورٹ میں درخواست دائر کر دی ہے۔

سپریم کورٹ میں جمع کرائی گئی درخواست میں ظاہر جعفر کی جانب سے مؤقف اپنایا گیا ہے کہ عدالت نے ملزم کی ذہنی حالت کا باقاعدہ طبی معائنہ کرانے کا حکم نہیں دیا، بلکہ صرف ویڈیو ریکارڈنگز پر انحصار کرتے ہوئے سزا سنائی گئی۔

درخواست میں مؤقف اختیار کیا گیا ہے کہ ٹرائل کے دوران پیش کی گئی ویڈیوز نہ تو درست ثابت ہوئیں اور نہ ہی یہ ویڈیوز ملزم کو فراہم کی گئیں۔ یہاں تک کہ مقدمے کے دوران یہ ویڈیوز چلائی بھی نہیں گئیں۔ درخواست میں کہا گیا ہے کہ عدالتی فیصلہ عجلت میں کیا گیا، جبکہ اس پر نظرثانی کی مضبوط وجوہات موجود ہیں۔

مزید برآں، طاہر جعفر نے یہ بھی مؤقف اختیار کیا کہ انہوں نے میڈیکل بورڈ کی تشکیل کی استدعا کی تھی، لیکن عدالت نے اس متفرق درخواست پر کوئی فیصلہ نہیں سنایا۔