سونے کی قیمت میں ہزاروں روپے اضافہ

پاکستان میں سونے کی قیمت میں آج نمایاں اضافہ ریکارڈ کیا گیا ہے، جس سے مقامی مارکیٹ میں فی تولہ سونا نئی بلند ترین سطح پر پہنچ گیا ہے۔

آل پاکستان جیمز اینڈ جیولرز ایسوسی ایشن کے مطابق، فی تولہ سونے کی قیمت میں 3,700 روپے کا اضافہ ہوا، جس کے بعد نئی قیمت 3 لاکھ 64 ہزار 900 روپے ہو گئی۔ اسی طرح 10 گرام سونا 3,171 روپے اضافے کے ساتھ 3 لاکھ 12 ہزار 842 روپے میں فروخت ہو رہا ہے۔

بین الاقوامی مارکیٹ میں بھی سونے کی قیمت میں اضافہ دیکھا گیا، جہاں سونا 37 ڈالر اضافے کے بعد 3,424 ڈالر فی اونس ہو گیا ہے۔

سونا روایتی طور پر ایک محفوظ سرمایہ کاری سمجھا جاتا ہے، خاص طور پر ایسے وقت میں جب افراطِ زر، سیاسی یا معاشی غیر یقینی صورتحال بڑھ جائے۔ تاریخ میں سونے کو کرنسی اور دولت کی علامت کے طور پر استعمال کیا جاتا رہا ہے، اور جب سرمایہ کار دیگر اثاثوں پر اعتماد کھو بیٹھتے ہیں تو وہ سونے کا رخ کرتے ہیں۔

یاد رہے کہ پاکستان میں گزشتہ برس سونے کی قیمت کے تعین کے طریقہ کار میں تبدیلی کی گئی تھی، جس کے تحت سونے کی قیمت بین الاقوامی مارکیٹ ریٹ سے 20 ڈالر فی اونس زیادہ مقرر کی جاتی ہے۔