اسلام آباد ہائیکورٹ نے توہین مذہب کمیشن کی تشکیل پر عملدرآمد روک دیا

اسلام آباد ہائیکورٹ نے توہینِ مذہب کے الزامات کی تحقیقات کے لیے کمیشن تشکیل دینے کے فیصلے پر عملدرآمد روک دیا ہے۔

جسٹس خادم حسین اور جسٹس اعظم خان پر مشتمل ڈویژن بینچ نے حکم جاری کرتے ہوئے جسٹس سردار اعجاز اسحاق کی جانب سے کمیشن کی تشکیل کا دیا گیا فیصلہ معطل کر دیا۔

یہ حکم راؤ عبدالرحیم ایڈووکیٹ کی جانب سے دائر کی گئی انٹراکورٹ اپیل پر جاری کیا گیا، جو کمیشن کی تشکیل کے خلاف دائر کی گئی تھی۔

یاد رہے کہ گزشتہ ہفتے اسلام آباد ہائیکورٹ کے جسٹس سردار اعجاز اسحاق نے توہینِ مذہب کے مقدمات کی تحقیقات کے لیے کمیشن قائم کرنے سے متعلق درخواستوں کی سماعت کی تھی۔ انہوں نے درخواستیں منظور کرتے ہوئے وفاقی حکومت کو 30 روز کے اندر کمیشن قائم کرنے کا حکم دیا تھا۔

عدالتی حکم میں کہا گیا تھا کہ تشکیل دیا گیا کمیشن چار ماہ کے اندر اپنی تحقیقات مکمل کرے۔