سونے کی قیمت میں ریکارڈ کمی

پاکستان میں آج سونے کی قیمت میں نمایاں کمی ریکارڈ کی گئی ہے۔

آل پاکستان جیمز اینڈ جیولرز ایسوسی ایشن کے مطابق، بین الاقوامی مارکیٹ میں سونے کی قیمت میں واضح کمی کے بعد مقامی سطح پر بھی سونے کی قیمت کم ہو گئی ہے۔

ایسوسی ایشن کے مطابق، عالمی سطح پر قیمت میں گراوٹ کے بعد پاکستان میں فی تولہ سونا 5900 روپے سستا ہو کر 3 لاکھ 59 ہزار روپے کا ہو گیا ہے۔

اسی طرح 10 گرام سونے کی قیمت میں 5058 روپے کی کمی ہوئی ہے، جس کے بعد اس کا نیا نرخ 3 لاکھ 7 ہزار 784 روپے مقرر کیا گیا ہے۔
بین الاقوامی مارکیٹ میں سونا 61 ڈالر کی کمی کے بعد 3363 ڈالر فی اونس پر آ گیا ہے۔

یہ امر قابلِ ذکر ہے کہ سونا طویل عرصے سے محفوظ سرمایہ کاری کا ذریعہ سمجھا جاتا ہے، خصوصاً افراطِ زر، سیاسی یا معاشی بے یقینی کے ادوار میں اس کی قیمت میں اضافہ دیکھنے کو ملتا ہے۔

صدیوں سے سونا دولت اور کرنسی کے طور پر استعمال ہوتا رہا ہے۔ جب سرمایہ کار دیگر اثاثوں کے حوالے سے غیر یقینی کا شکار ہوتے ہیں تو وہ سونے کو ترجیح دیتے ہیں۔

یاد رہے کہ گزشتہ برس پاکستان میں سونے کی قیمت کے تعین کے طریقہ کار میں تبدیلی کی گئی تھی، جس کے تحت مقامی ریٹ کو عالمی مارکیٹ کے مقابلے میں 20 ڈالر فی اونس زیادہ رکھا گیا تھا۔