عمران خان نے 9 مئی کیسز میں ضمانت منسوخی کا فیصلہ سپریم کورٹ میں چیلنج کر دیا

پاکستان تحریک انصاف کے بانی عمران خان نے 9 مئی کے واقعات سے متعلق مقدمات میں ضمانت کی درخواستیں مسترد کیے جانے کے لاہور ہائی کورٹ کے فیصلے کو سپریم کورٹ میں چیلنج کر دیا ہے۔

سپریم کورٹ میں دائر درخواست میں وفاقی حکومت اور تھانہ گلبرگ لاہور کے انسپکٹر عمران صادق کو فریق بنایا گیا ہے۔ درخواست گزار نے مؤقف اختیار کیا ہے کہ لاہور ہائی کورٹ کا فیصلہ کالعدم قرار دے کر انہیں ضمانت پر رہا کیا جائے۔

درخواست میں کہا گیا ہے کہ ان مقدمات میں عمران خان کی مداخلت ممکن نہیں تھی کیونکہ وہ اس وقت نیب کی حراست میں تھے۔ درخواست میں یہ بھی مؤقف اختیار کیا گیا ہے کہ مقدمات میں ثبوت کا فقدان ہے، پراسیکیوشن کے بیانات آپس میں تضاد کا شکار ہیں، جس سے کیس کی ساکھ مشکوک ہو جاتی ہے۔

عمران خان کی طرف سے کہا گیا ہے کہ پولیس نے گرفتاری میں پانچ ماہ کی تاخیر کی، جو بدنیتی کو ظاہر کرتی ہے، اور اس تاخیر سے ثابت ہوتا ہے کہ پولیس کا رویہ جانبدارانہ اور غیر پیشہ ورانہ تھا۔

یاد رہے کہ گزشتہ سال لاہور کی انسداد دہشت گردی عدالت نے 9 مئی کے واقعات، بشمول جناح ہاؤس حملے، سے متعلق آٹھ مقدمات میں عمران خان کی بعد از گرفتاری ضمانت کی درخواستیں مسترد کر دی تھیں۔ یہ فیصلے جج منظر علی گل نے سنائے تھے۔