چیف جسٹس کی دعوت پر اپوزیشن لیڈر عمر ایوب کا اسلام آباد میں ملاقات سے انکار

اسلام آباد: چیف جسٹس یحییٰ آفریدی کی جانب سے ملاقات کی دعوت کے باوجود قومی اسمبلی میں قائد حزبِ اختلاف عمر ایوب نے اسلام آباد میں ملاقات سے انکار کر دیا۔

ذرائع کے مطابق چیف جسٹس نے عمر ایوب سے رابطہ کیا اور انہیں جمعے کے روز اسلام آباد میں ملاقات کی دعوت دی، تاہم اپوزیشن لیڈر نے سیکیورٹی خدشات کے باعث دارالحکومت آنے سے انکار کر دیا۔

عمر ایوب نے مؤقف اختیار کیا کہ اگر وہ اسلام آباد آئے تو انہیں گرفتار کیے جانے کا خدشہ ہے، جس کے باعث وہ دارالحکومت نہیں آ سکتے۔

ذرائع کے مطابق عمر ایوب کے انکار پر چیف جسٹس یحییٰ آفریدی نے متبادل تجویز پوچھی، جس پر اپوزیشن لیڈر نے پشاور میں ملاقات کی خواہش کا اظہار کیا۔

یاد رہے کہ عمر ایوب نے حال ہی میں چیف جسٹس آف پاکستان کو ایک خط لکھا تھا جس میں انہوں نے عدالتی رویے پر تحفظات کا اظہار کرتے ہوئے کہا تھا کہ موجودہ عدالتی طرزِ عمل ملک کے جمہوری نظام کے لیے خطرہ بن رہا ہے۔