ہنزہ میں اضافی سیلز ٹیکس کے خلاف احتجاج نویں روز بھی جاری، خنجراب بارڈر پر تجارتی سرگرمیاں معطل

ہنزہ: پاک چین تجارت سے وابستہ افراد کی جانب سے اضافی سیلز ٹیکس کے خلاف احتجاج نویں روز بھی جاری ہے، جس کے باعث خنجراب بارڈر پر دونوں اطراف کی تجارتی سرگرمیاں معطل ہو گئی ہیں۔

مظاہرین نے شاہراہِ قراقرم پر دھرنا دے رکھا ہے اور امیگریشن و کسٹمز آفس کو کنٹینرز لگا کر بند کر دیا ہے، جس کے نتیجے میں چین جانے اور وہاں سے آنے والی متعدد گاڑیاں سرحد کے دونوں جانب پھنس گئی ہیں۔

احتجاجی مظاہرین کا کہنا ہے کہ وہ سیلز ٹیکس اور ایڈیشنل سیلز ٹیکس کے نفاذ کے خلاف سراپا احتجاج ہیں، اور جب تک ان ٹیکسز کو واپس نہیں لیا جاتا، دھرنا جاری رہے گا۔

دوسری جانب کسٹمز حکام کا مؤقف ہے کہ ٹیکسز کی وصولی ایف بی آر کے موجودہ قوانین کے تحت کی جا رہی ہے، اور ان میں کسی قسم کی غیر قانونی کارروائی شامل نہیں۔

احتجاج کے باعث خطے میں تجارتی سرگرمیوں کے ساتھ ساتھ مقامی معیشت بھی متاثر ہو رہی ہے، جب کہ دونوں ممالک کے درمیان زمینی رابطہ فی الحال تعطل کا شکار ہے۔