مودی حکومت کی ایک اور سازش ، پاکستان کو دوبارہ فیٹف گرے لسٹ میں ڈالنے کا مطالبہ  کر دیا

نئی دہلی : بھارتی حکومت نے فنانشل ایکشن ٹاسک فورس(ایف ٹی اے ایف) میں  پاکستان کودوبارہ گرے لسٹ میں ڈالنے کے لیے وزیراعلیٰ خیبرپختونخوا علی امین گنڈاپور کا بیان پاکستان کے خلاف بطور ثبوت جمع کروادیا ہے۔

تفصیلات کے مطابق علی امین گنڈاپور نے حالیہ بیان میں الزام عائد کیا تھا کہ ہم طالبان کو گرفتار کرتے ہیں، لیکن ادارے انہیں رہا کر دیتے ہیں۔ 

فیٹف حکام کے مطابق بھارت نے اس بیان کو پاکستان کے خلاف چارج شیٹ قرار دیتے ہوئے مؤقف اپنایا ہے کہ پاکستان دہشتگردوں کی حمایت کرتا ہے۔

بھارتی حکام نے مطالبہ کیا ہے کہ پاکستان کو دوبارہ فیٹف کی گرے لسٹ میں شامل کیا جائے۔

دوسری جانب بھارتی میڈیا اور حکومت کی جانب سے اس وقت سے پاکستان کے خلاف مسلسل پروپیگنڈا جاری ہے تاکہ اسے دوبارہ گرے لسٹ میں شامل کرایا جا سکے۔

یاد رہے کہ فیٹف نے اکتوبر 2022 میں پاکستان کو گرے لسٹ سے نکالا تھا، جس میں وہ 2018 سے شامل تھا۔