عالمی ادارہ صحت نے پاکستان اور افغانستان کو پولیو وائرس کے عالمی پھیلاؤکا ذمہ دار قرارد ے دیا

جینوا: عالمی ادارہ صحت (ڈبلیو ایچ او) نے پاکستان اور افغانستان کو پولیو وائرس کے عالمی پھیلاؤ کا ذمہ دار قرار دے دیا ہے۔

تفصیلات کے مطابق ڈبلیو ایچ او کی ایمرجنسی کمیٹی برائے پولیو کے 42واں اجلاس 18 جون کو ویڈیو لنک کے ذریعے منعقد ہوا، جس میں پولیو سے متاثرہ ممالک کے حکام نے شرکت کی۔

ڈبلیو ایچ او اعلامیہ میں کہا گیا کہ اجلاس میں وائلڈ پولیو وائرس ون (WPV1) کے عالمی پھیلاؤ، بالخصوص پاکستان اور افغانستان میں جاری خطرات پر تفصیلی غور کیا گیا۔

عالمی ادارہ صحت کی جانب سے جاری اعلامیے میں کہا گیا ہے کہ پاکستان اور افغانستان انسداد پولیو کیلئے دو طرفہ تعاون جاری رکھیں۔

اعلامیے میں مزید کہاگیا ہے کہ ڈبلیو ایچ او 3 ماہ بعد انسداد پولیو کیلئے پاکستان کے اقدامات کا جائزہ لے گا۔

عالمی ادارہ صحت نے پاکستان میں پولیو وائرس کے پھیلاؤ پر اظہار تشویش کرتے ہوئے کہا کہ پاکستان سے بیرون ملک جانے والوں کی پولیو سے بچاؤ کی ویکسی نیشن لازمی ہوگی۔

انہوں نے کہا کہ پاکستان کی پولیو کے بارے میں سرویلنس مزید 3 ماہ جاری رہے گی،جبکہ انسداد پولیو کیلئے پاک افغان باہمی تعاون کا فروغ ناگزیر ہے۔