اسلام آباد ایکسپریس کی بوگیاں پٹڑی سے اتر گئیں، 25 مسافر زخمی

لاہور سے راولپنڈی جانے والی اسلام آباد ایکسپریس کو شاہدرہ کے قریب حادثہ پیش آیا، جس کے نتیجے میں بوگیاں پٹڑی سے اتر گئیں اور کم از کم 25 مسافر زخمی ہو گئے۔ واقعے کے فوراً بعد وزیر ریلوے حنیف عباسی نے واقعے کا نوٹس لیتے ہوئے مکمل رپورٹ طلب کر لی۔

حادثہ کالا شاہ کاکو کے قریب پیش آیا، جہاں اسلام آباد ایکسپریس کی کئی بوگیاں ٹریک سے اتر گئیں، جس سے ریلوے ٹریک پر ٹرینوں کی آمد و رفت معطل ہو گئی۔ متعدد مسافر گاڑیاں، جن میں گرین لائن اور ریل کاریں بھی شامل ہیں، مختلف اسٹیشنوں پر روک دی گئیں۔

وزیر ریلوے نے چیف ایگزیکٹیو آفیسر ریلوے اور ڈویژنل سپرنٹنڈنٹ کو فوری طور پر جائے حادثہ پر پہنچنے کی ہدایت دی، ساتھ ہی امدادی کاموں میں تیزی لانے اور زخمیوں کو فوری طبی سہولیات فراہم کرنے کا حکم دیا۔

انہوں نے حادثے کی باقاعدہ انکوائری کا اعلان کرتے ہوئے سات دن کے اندر رپورٹ پیش کرنے کی ہدایت کی ہے۔

دوسری جانب وزیراعظم شہباز شریف نے بھی حادثے پر گہرے افسوس کا اظہار کیا اور ریسکیو اداروں کو امدادی کارروائیاں تیز کرنے کی ہدایت دی۔ انہوں نے زخمیوں کو فوری طبی امداد فراہم کرنے اور ان کی جلد صحتیابی کے لیے نیک تمناؤں کا اظہار کیا۔