یوم استحصال کشمیر،قومی اسمبلی میں بھارت کے خلاف دو مذمتی قراردادیں منظور، کشمیری عوام سے اظہار یکجہتی

قومی اسمبلی میں بھارت کی جانب سے 5 اگست 2019 کو مقبوضہ جموں و کشمیر میں کیے گئے غیر قانونی و یکطرفہ اقدامات کی شدید مذمت کرتے ہوئے یومِ استحصالِ کشمیر کے موقع پر دو مذمتی قراردادیں متفقہ طور پر منظور کرلیں۔

قراردادوں میں کشمیری عوام کے حقِ خودارادیت اور اقوام متحدہ کی قراردادوں کے مطابق مسئلہ کشمیر کے حل پر زور دیا گیا۔ پہلی قرارداد وفاقی وزیر برائے امورِ کشمیر انجینئر امیر مقام نے اردو زبان میں پیش کی، جس میں کہا گیا کہ بھارت کے متعصبانہ اقدامات کی شدید الفاظ میں مذمت کی جاتی ہے۔ بھارت نے مقبوضہ کشمیر میں ظلم و جبر کا بازار گرم کر رکھا ہے، مگر حالیہ معرکہ حق نے بھارتی غرور کو خاک میں ملا دیا ہے ۔

امیر مقام کی قرارداد میں مزید کہا گیا کہ اس معرکے نے کشمیری بہن بھائیوں کے حوصلے مزید بلند کیے ہیں۔ قرارداد میں پاکستان تحریک انصاف (پی ٹی آئی) کی جانب سے 5 اگست کو دی گئی احتجاجی کال کو افسوسناک قرار دیا گیا۔

دوسری قرارداد پاکستان پیپلز پارٹی کی رکن قومی اسمبلی شازیہ مری نے انگریزی زبان میں پیش کی، جس میں کہا گیا کہ بھارت کی جانب سے کیے گئے یکطرفہ اقدامات جموں و کشمیر کی خصوصی حیثیت کو ختم نہیں کر سکتے۔ مسئلہ کشمیر کا حل کشمیری عوام کی خواہشات اور اقوام متحدہ کی قراردادوں کے مطابق تلاش کیا جائے کیونکہ جموں و کشمیر برصغیر کی تقسیم کا ایک نامکمل ایجنڈا ہے۔

قرارداد میں 5 اگست کو یومِ سیاہ قرار دیا گیا اور کہا گیا کہ اس دن سے مقبوضہ کشمیر میں مظالم کا ایک لا متناہی سلسلہ شروع ہو چکا ہے۔شازیہ مری نے کہا کہ پاکستانی قوم کشمیری عوام کی جدوجہد آزادی کی ہر فورم پر حمایت جاری رکھے گی۔

دونوں قراردادیں قومی اسمبلی میں متفقہ طور پر منظور ہو گئیں ، جس سے پاکستانی پارلیمان کی طرف سے کشمیری عوام کے ساتھ مکمل اظہار یکجہتی اور بھارتی مظالم کے خلاف واضح پیغام دیا گیا