غزہ پر قبضہ کرنے نہیں بلکہ حماس سے آزاد کرانے جا رہے ہیں، نیتن یاہو

فلسطین پر قابض صیہونی وزیر اعظم بنیا مین نیتن یاہو نے کہا ہے کہ اسرائیل غزہ پر قبضہ کرنے نہیں بلکہ اسے حماس سے آزاد کرانے کا ارادہ رکھتاہے۔ 
تفصیلات کے مطابق گزشتہ روز اسرائیلی کابینہ نے وزیر اعظم کی غزہ پر عسکری قبضے کی تجویز منظور کی تھی جس پر عالمی سطح پر سخت رد عمل سامنے آیا۔

عالمی سطح پر مخالفت اور خطے میں بڑھتی کشیدگی کے خدشات کے باوجود اسرائیلی وزیراعظم کے تازہ بیان نے تنازع میں ایک نیا پہلو شامل کر دیا ہے۔  

غزہ پر قبضے سے متعلق نیے بیان میں نیتن یاہو کا کہنا ہے کہ غزہ کو غیر مسلح کر کے ایک پر امن شہری انتظامیہ قائم کی جائے گی جس میں نہ فلسطینی اتھارٹی، نہ حماس اور نہ کوئی دہشت گرد تنظیم شامل ہو گی۔

نیتن یاہو کا کہنا تھا کہ یہ قدم اسرائیلی یرغمالیوں کو آزاد کرانے میں مدد گار ثابت ہو گا۔   

آسٹریلیا، جرمنی، اٹلی، نیوزی لینڈ اور برطانیہ نے مشترکہ طور پر اس فیصلے کی مخالفت کی۔ 

پانچوں ممالک کے وزرائےخارجہ نے مشترکہ بیان میں کہا کہ وہ غزہ میں مزید بڑے فوجی آپریشن کے اسرائیلی فیصلے کو مسترد کرتے ہیں اور فلسطین کے دو ریاستی حل پر عمل درآمد کے عزم پر متحد ہیں۔ 

دوسری طرف پاکستان نے بھی اسرائیلی کابینہ کے فیصلے کی شدید مذمت کی ہے، وزیر اعظم پاکستان شہباز شریف نے کہا کہ صیہونی کابینہ کا منصوبہ فلسطینیوں کے خلاف جنگ میں خطرناک اضافے کے مترادف ہے اور یہ خطے میں امن کے کسی بھی امکان کو ختم کر دے گا۔ 
انہوں نے واضح کیا کہ پاکستان اسرائیل کو تسلیم نہیں کرتا۔ 

وزیر اعظم شہباز شریف نے عالمی برادری سے مطالبہ کیا کہ وہ اسرائیل کی بلا جواز جارحیت کو روکے، غزہ کے عوام تک انسانی امداد کی فراہمی یقینی بنانے اور بے گناہ شہریوں کو تخفظ دینے کے لیے فوری مداخلت کرے۔ 

دوسری طرف فلسطینی مزاحمتی تنظیم حماس نے بھی اسرائیلی کابینہ کے فیصلے کو سختی سے مسترد کرتے ہوئےاسےجنگی جرم قرار دیا، حماس نے خبردار کیا کہ یہ مجرمانہ مہم اسرائیلی افواج کو مہنگی پڑے گی اور غزہ پر قبضے کا راستہ آسان نہیں ہوگا۔