گلگت بلتستان کے لیے 100 میگا واٹ سولر پاور منصوبے کی منظوری

اسلام آباد:  وزیراعظم محمد شہباز شریف نے گلگت بلتستان کے عوام سے کیا گیا ایک اور وعدہ پورا کر دیا۔

 وزیراعظم کے اعلان کے محض دو دن بعد ایگزیکٹو کمیٹی آف نیشنل اکنامک کونسل (ایکنک) نے گلگت بلتستان کے  مختلف علاقوں میں 100 میگاواٹ سولر فوٹووولیٹک پاور پلانٹ منصوبے کی باضابطہ منظوری دے دی جس سے علاقے میں بجلی کی قلت کم کرنے میں مدد ملے گی ، یہ منصوبے سے پہلے سینٹرل ڈویلپمنٹ ورکنگ پارٹی سے منظور ہو چکا ہے۔ 

وزیر اعظم نے اپنے حالیہ دورہ گلگت بلتستان کے دوران اعلان کیا تھا کہ ایکنک جلد یہ منصوبہ منظور کرے گا، منصوبے سے استور ، داریل، تنگیر دیامر، کھانچے، غذر، گلگت، ہنزہ، اشکومن، نگر، روندو، اسکردو اور شگر کے اضلاع مستفید ہوں گے۔

24957 ملین روپے کی لاگت سے تیار ہونے والا یہ منصوبہ تین سال میں مکمل کیا جائے گا۔ 
حکام کے مطابق منصوبے کی تکمیل سے گلگت بلتستان میں عوامی سہولیات میں نمایاں بہتری اور توانائی کے بحران کے خاتمے میں مدد ملے گی۔ 

صوبے کی تقسیم کے مطابق پہلے مرحلے میں ضلع سکردو کو 18.162 میگا واٹ،  گلگت کو 28.013 میگاواٹ اور دیامر کو 13.126 میگاواٹ بجلی فراہم کی جائے گی ۔

تیسرے مرحلے میں باقی اضلاع کو 16.096 میگا واٹ بجلی مہیا کی جائے گی جبکہ اسپتالوں اور سرکاری دفاتر کے لیے آف دی گرڈ 18.162 میگاواٹ بجلی مختص ہوگی۔