راولپنڈی: غیرت کے نام پر قتل کیس، شوہر اور والد سمیت 6 ملزمان جوڈیشل ریمانڈ پر جیل منتقل

راولپنڈی کے علاقے پیر ودھائی میں شادی شدہ خاتون کے غیرت کے نام پر قتل کیس میں نامزد 6 ملزمان کو جوڈیشل ریمانڈ پر جیل بھیج دیا گیا ہے۔

مقامی عدالت میں سول جج ذیشان بٹ نے کیس کی سماعت کی، جس کے دوران پولیس نے ملزمان کو چار روزہ جسمانی ریمانڈ مکمل ہونے کے بعد عدالت میں پیش کیا۔

سماعت کے دوران پولیس نے ملزمان کے جسمانی ریمانڈ میں توسیع کی درخواست کی، تاہم عدالت نے یہ استدعا مسترد کر دی اور مقدمے میں نامزد شوہر، والد اور جرگے کے سربراہ سمیت چھ ملزمان کو جوڈیشل ریمانڈ پر جیل بھیجنے کا حکم دے دیا۔

یاد رہے کہ گزشتہ ماہ پیر ودھائی میں غیرت کے نام پر ایک شادی شدہ خاتون کو قتل کر دیا گیا تھا۔ واقعے کے بعد پولیس نے خاتون کے اہل خانہ سمیت آٹھ سے زائد افراد کو گرفتار کیا۔

پولیس ذرائع کے مطابق، دورانِ تفتیش جرگے کے سربراہ نے خاتون کو قتل کرنے کا اعتراف بھی کیا ہے۔