وزیردفاع خواجہ آصف کا بھارت کو طیاروں کے ذخیرے کی آزادانہ تصدیق کا چیلنج

وزیردفاع خواجہ آصف نے بھارتی دعوے پر ردعمل دیتے ہوئے کہا ہے کہ پاکستان کے کسی بھی طیارے کو بھارت نے نہ تو گرایا اور نہ ہی نقصان پہنچایا۔ ان کا کہنا تھا کہ بھارتی ائیرفورس کے سربراہ کے اس دعوے کا نہ صرف کوئی حقیقت نہیں بلکہ یہ غیر مناسب وقت پر کیا گیا ہے، کیونکہ گزشتہ تین ماہ میں اس طرح کا کوئی دعویٰ سامنے نہیں آیا۔

خواجہ آصف نے مزید کہا کہ پاکستان نے بین الاقوامی میڈیا کو فوراً تفصیلی تکنیکی بریفنگ فراہم کی، اور غیرجانبدار مبصرین نے بھارت کے متعدد طیاروں، بشمول رافیل، کے نقصان کا اعتراف کیا۔ ان کا کہنا تھا کہ بھارتی طیاروں کے تباہ ہونے کے بارے میں اعترافات مختلف ذرائع سے سامنے آئے، جن میں عالمی رہنما، بھارتی سیاستدان اور غیر ملکی انٹیلی جنس جائزے شامل تھے۔

وزیردفاع نے یہ بھی کہا کہ پاکستان نے بھارت کے 6 جنگی طیارے اور ایس 400 فضائی دفاعی نظام کو تباہ کیا، جبکہ بھارت کے ڈرون بھی تباہ کیے گئے۔ اس کے علاوہ، پاکستان نے بھارتی فضائیہ کے کئی اڈوں کو بھی ناکارہ بنایا۔

“The belated assertions made by the Indian Air Force Chief regarding alleged destruction of Pakistani aircraft during Operation Sindoor are as implausible as they are ill-timed. It is also ironic how senior Indian military officers are being used as the faces of monumental…

— Khawaja M. Asif (@KhawajaMAsif) August 9, 2025

انہوں نے کہا کہ لائن آف کنٹرول پر بھارتی افواج کو جانی اور مالی نقصانات کا سامنا بھی بہت زیادہ تھا۔

خواجہ آصف نے بھارت کو دونوں ممالک کے طیاروں کے موجودہ ذخیرے کی آزادانہ تصدیق کا چیلنج کیا اور کہا کہ اگر حقیقت کا پتہ چلانا ہے، تو دونوں ممالک اپنے طیاروں کے ذخیرے کی آزادانہ تصدیق کرائیں، کیونکہ ان کا گمان ہے کہ ایسا کرنے سے بھارت کی چھپائی گئی حقیقت سامنے آ جائے گی۔

انہوں نے مزید کہا کہ جنگیں جھوٹ یا دعووں سے نہیں بلکہ اخلاقی برتری، قومی عزم اور پیشہ ورانہ مہارت سے جیتی جاتی ہیں۔ اس طرح کے دعوے اندرونی سیاسی فوائد کے لیے بنائے جاتے ہیں اور ایسے بیانات ایٹمی خطے میں اسٹریٹجک غلطیوں کے سنگین خطرات بڑھاتے ہیں۔

یاد رہے کہ پاک فضائیہ سے جھڑپ کے بعد بھارتی ائیرچیف نے چار ماہ بعد یہ دعویٰ کیا کہ بھارت نے پاکستان کے 6 طیارے تباہ کیے۔ بھارتی ائیرچیف مارشل اے پی سنگھ نے یہ دعویٰ کیا کہ بھارتی فضائیہ نے پاکستان کے ایئر فیلڈز کو نشانہ بنا کر وہاں موجود طیاروں کو تباہ کیا۔

تاہم، بھارتی ائیرچیف کا یہ دعویٰ بغیر کسی ثبوت کے تھا اور اس سے بھارت کی ائیرفورس کی پیشہ ورانہ مہارت پر مزید سوالات اٹھ گئے۔ اس کے برعکس، پاکستان نے سات مئی کی فضائی جنگ کے فوراً بعد ہی بھارتی طیاروں کو مار گرانے کی تفصیلات جاری کر دی تھیں، جن کی تصدیق بھارتی میڈیا کی رپورٹس سے بھی ہوئی تھی۔ اسی دوران، پاک فضائیہ نے بھارتی طیاروں کی کمیونیکیشن ہیک کر کے ان کی کاک پٹ میں ہونے والی گفتگو بھی سنی تھی۔