اسپین :قرطبہ کی تاریخی مسجد میں آگ لگنے کا واقعہ، فائر بریگیڈ کی بروقت کارروائی سے بڑے نقصان سے بچ گئی

اسپین کے شہر قرطبہ میں واقع تاریخی جامع مسجد میں اچانک آگ بھڑک اٹھی، تاہم فائر بریگیڈ نے فوری کارروائی کر کے آگ پر قابو پا لیا۔

غیر ملکی میڈیا کے مطابق، یہ واقعہ گزشتہ روز پیش آیا۔ ابتدائی تحقیقات کے مطابق، فرش صاف کرنے والی مشین میں شارٹ سرکٹ کی وجہ سے آگ لگی، جس نے قریبی علاقے کو بھی اپنی لپیٹ میں لے لیا۔

فائر بریگیڈ کے عملے نے فوراً موقع پر پہنچ کر آگ پر قابو پایا، اور اس دوران علاقے کو مکمل طور پر خالی کروا لیا گیا۔ آگ بجھانے کے بعد، پولیس اور فائر بریگیڈ کا عملہ رات بھر جائے وقوعہ پر موجود رہا تاکہ کسی بھی ممکنہ خطرے کو روکا جا سکے۔

قرطبہ کے میئر نے فائر فائٹرز کی بروقت کارروائی کو سراہتے ہوئے کہا کہ فائر بریگیڈ کی فوری مداخلت کی بدولت کوئی بڑا سانحہ نہیں ہوا۔

یہ بھی یاد رہے کہ تاریخی قرطبہ مسجد اب چرچ میں تبدیل ہو چکی ہے اور اسے "مسجد کیتھیڈرل قرطبہ" (Cordoba Mosque-Cathedral) کہا جاتا ہے۔ یہ عمارت یونیسکو کے عالمی ثقافتی ورثے کا بھی حصہ ہے۔

سوشل میڈیا پر اس تاریخی عمارت میں لگی آگ کی تصاویر اور ویڈیوز وائرل ہو گئیں، جس پر لوگوں نے تشویش کا اظہار کیا۔

مقامی میڈیا کے مطابق، ہفتے کے روز اس تاریخی عمارت کو دوبارہ سیاحوں کے لیے کھول دیا گیا، تاہم آگ سے متاثرہ حصہ تاحال بند رکھا گیا ہے۔