افغان سفیرکی بیٹی کونامعلوم افراد نے اغوا کرنے بعد چھوڑ دیا

تفصیلات کے مطابق ترجمان دفتر خارجہ کا کہنا ہے کہ گذشتہ روز افغان سفارتخانے نے اطلاع دی کہ افغان سفیر کی بیٹی پر کار میں سوار ہوتے وقت حملہ کیا گیا، واقعے کی اطلاع پر فوری اسلام آباد پولیس نے تحقیقات کا آغاز کردیا۔ دفتر خارجہ نے کہا کہ وزارت خارجہ اور سیکیورٹی حکام سفیر اور ان کےاہل خانہ سے رابطے میں ہیں۔

ترجمان دفتر خارجہ کا کہنا ہے کہ وزارت خارجہ اور سیکیورٹی حکام اس معاملے میں مکمل تعاون فراہم کر رہے ہیں، ملزمان کا سراغ لگانے اور انصاف کے کٹہرے میں لانے کی کوشش کررہے ہیں۔

دفتر خارجہ نے کہا کہ افغان سفیر اور ان کے اہل خانہ کی سیکیورٹی بڑھا دی گئی ہے، سفارتکاروں ان کے اہل خانہ کی سیکیورٹی کے لیے پرعزم ہیں، اس طرح کے واقعات ناقابل برداشت ہیں۔

یاد رہے کہ گزشتہ روز افغان سفیر کی بیٹی کو اسلام آباد میں اغوا کیا گیا تھا پولیس ذرائع کے مطابق لڑکی کو تھوڑی دیر بعد چھوڑ دیا گیا تھا ، نامعلوم افراد نے لڑکی کے ہمراہ پچاس روپے کے نوٹ بھی رکھاہے ، ‏50 روپے کے نوٹ پرافغان سفیرنجیب اللہ کے کمیونسٹ ہونےسے متعلق تحریربھی ‏درج تھی، پولیس حکام کا کہنا ہے خاتون کا میڈیکل کروا لیا گیا، درخواست کےبغیرکارروائی نہیں کرسکتے ۔

وقاقی دارالحکومت پولیس کا کہنا ہے کہ ابھی تک افغان سفارتخانے یا سفیرکی جانب سے تحریری درخواست موصول نہیں ہوئی ہے ، متاثرہ لڑکی کی تحریری درخواست پرہی مذید قانونی کاروائی عمل میں لائی جائے گی ۔