25 سال کی عمر میں اداکار بننے کا سوچا، پہلے موقع کے لیے 4 سال محنت کی: شبیر جان

سینئر اداکار شبیر جان نے کہا ہے کہ پاکستانی فنکاروں کی زندگی بھارتی اداکاروں سے یکسر مختلف ہے، کیونکہ جو سہولیات اور وسائل بھارتی اداکاروں کو حاصل ہیں، وہ پاکستانی فنکاروں کو دستیاب نہیں۔

شبیر جان حال ہی میں مزاحیہ پروگرام  میں شریک ہوئے، جہاں انہوں نے اپنے فنی سفر کے ساتھ ساتھ ذاتی زندگی کے مختلف پہلوؤں پر بھی کھل کر گفتگو کی۔

پروگرام میں گفتگو کرتے ہوئے انہوں نے بتایا کہ انہوں نے 25 برس کی عمر کے بعد اداکاری کے میدان میں قدم رکھنے کا فیصلہ کیا۔ تاہم، پہلے موقع کے حصول کے لیے انہیں کئی برس تک محنت کرنا پڑی۔

ان کا کہنا تھا کہ 25 سال سے پہلے انہوں نے کبھی نہیں سوچا تھا کہ وہ اداکار بنیں گے، لیکن ایک دن کسی اداکار کو پرفارم کرتے دیکھ کر انہوں نے فیصلہ کیا کہ وہ بھی یہی شعبہ اپنائیں گے۔

شبیر جان نے مزید بتایا کہ اداکاری سے قبل انہوں نے مختلف نوکریاں کیں، جن میں فیکٹری میں کام کرنا بھی شامل ہے۔ تاہم جلد ہی انہیں احساس ہو گیا کہ ملازمت کرنا ان کے مزاج کے خلاف ہے اور وہ ایسی زندگی نہیں گزار سکتے۔

انہوں نے انکشاف کیا کہ اداکاری میں پہلا بریک حاصل کرنے کے لیے انہوں نے تقریباً چار سال تک سخت محنت کی۔ انہوں نے بتایا کہ پی ٹی وی کے ساتھ کام کرتے ہوئے انہیں کئی نامناسب حالات اور رویے بھی برداشت کرنے پڑے، کیونکہ اس وقت ملک میں صرف ایک ہی چینل تھا، اور کوئی متبادل موجود نہیں تھا۔

انہوں نے مزید تفصیلات تو نہیں بتائیں، لیکن کہا کہ اس دور میں انہیں اپنی طبعیت کے خلاف بہت کچھ برداشت کرنا پڑا۔

ایک سوال کے جواب میں، جب ان سے ان کے وزن کے حوالے سے پوچھا گیا کہ وہ جوانی میں بھی صحت مند تھے اور اب بھی ویسے ہی ہیں، تو انہوں نے ہنستے ہوئے جواب دیا کہ وہ روز وزن کم کرنے کا سوچتے ہیں، مگر روز ہی اپنی سوچ کو بھول جاتے ہیں