فواد خان اور وانی کپور کی فلم’ عبیر گلال‘ پاکستان سمیت دنیا بھر میں ریلیز ہونے کو تیار

ویب ڈیسک :پاکستان کے مقبول سپر اسٹار فواد خان اور بھارتی اداکارہ وانی کپور کی رومانوی فلم’’ عبیر گلال ‘‘بالآخر نئی تاریخ کے ساتھ عالمی سطح پر ریلیز ہونے جارہی ہے۔ 

فلم کی ہدایت کاری آرتی ایس باگدی نے دی ہے جبکہ پروڈکشن وویک بی اگروال نے کی ہے۔

پروڈیوسرز کے مطا بق عبیر گلال 12 ستمبر 2025 سے دنیا کے 75 ممالک میں ایک ہزار سے زائد سنیما اسکرینز پر نمائش کے لیے پیش کی جائے گی۔

خیال رہے کہ فلم اس سے قبل 29 اگست کو ریلیز ہونا تھی ، تاہم پاکستان اور بھارت کے درمیان کشیدگی کے باعث بھارت میں اس کی نمائش روک دی گئی تھی،تاہم اب پروڈیوسرز نے فیصلہ کیا ہے کہ بھارت کے علاوہ باقی دنیا میں فلم کو ریلیز کیا جائے گا۔ 

پروڈیوسرز کا مزید کہنا ہے کہ بھارت میں نمائش نہ ہونے کے باوجود عبیر گلال بین الاقوامی سطح پر بہترین بزنس کرنے کی صلاحیت رکھتی ہے۔ پاکستان میں فلم حسب اعلان 29 اگست کو ہی ریلیز کی جائے گی جس کا شائقین بے صبری سے انتظار کر رہے ہیں۔