خیبر پختونخوا کے علاقے ٹانک اور شمالی وزیرستان میں پولیو وائرس کے دو نئے کیسز رپورٹ

نیشنل ایمرجنسی آپریشنز سینٹر (این ای او سی) کے مطابق جنوبی خیبر پختونخوا کے علاقوں ٹانک اور شمالی وزیرستان میں پولیو وائرس کے دو نئے کیسز رپورٹ ہوئے ہیں، متاثرہ دونوں بچے پولیو وائرس سے متاثر پائے گئے ہیں۔ رواں سال پاکستان میں پولیو وائرس کے مجموعی مریضوں کی تعداد 23 ہوگئی ہے

این ای او سی کا کہنا ہے کہ ان نئے کیسز کے بعد ۔ ملک بھر میں پولیو وائرس کےبڑھتے خدشات کےپیش نظر وزیراعظم شہباز شریف نے چاروں وزرائے اعلیٰ اور چیف سیکرٹریز کو ذاتی طور پر 27 اگست کو وزیر اعظم ہاؤس طلب کر لیا ہے۔ اجلاس میں ملک گیر انسدادِ پولیو حکمتِ عملی کا تفصیلی جائزہ لیا جائے گا۔

رپورٹس کے مطابق ملک کے 75 سے زائد اضلاع کے ماحولیاتی نمونوں میں پولیو وائرس کی موجودگی کا انکشاف ہوا ہے۔ اس سے قبل ملک کے 4 علاقوں کے ماحولیاتی نمونوں میں پولیو وائرس کی سب سے خطرناک قسم پائی گئی تھی جن میں دیامر، جنوبی وزیرستان، لاہور اور راولپنڈی کے نمونوں میں پولیو وائرس کی سب سے خطرناک قسم بھی پائی جا چکی ہے۔

این ای او سی کے مطابق ملک بھر میں قومی انسداد پولیو مہم یکم سے 7 ستمبر تک جاری رہے گی۔ اس دوران پانچ سال سے کم عمر کے دو کروڑ 80 لاکھ بچوں کو پولیو سے بچاؤ کے قطرے پلائے جائیں گے۔ یہ مہم چاروں صوبوں اور تمام ریجنز کے 99 اضلاع میں منعقد کی جائے گی۔