رواں سال کی پانچویں اور آخری انسداد پولیو مہم ملک بھر میں جاری،4کروڑ بچوں کو قطر ے پلانے کا ہدف

ویب ڈیسک : رواں سال کی پانچویں اور آخری قومی انسداد پولیو مہم  ملک بھر میں جاری ہے۔

نیشنل ایمرجنسی آپریشنز سینٹر (این ای او سی) کے مطابق انسداد پولیو مہم کے دوران 4 کروڑ 50لاکھ سے زائد بچوں کو پولیو سے بچاؤ کے قطرے پلائے جائیں گے ، 2025 کی آخری پولیو مہم 21 دسمبر تک جاری رہے گی۔

نیشنل ای او سی کے مطابق پنجاب میں 2 کروڑ 30 لاکھ سے زائد بچوں کو سندھ میں 1 کروڑ 6 لاکھ سے زائد ،خیبر پختونخوا میں 72 لاکھ سے زائد ،بلوچستان میں 26 لاکھ ،اسلام آباد میں 4 لاکھ 60 ہزار سے زائد ،گلگت بلتستان میں 2 لاکھ 28 ہزار ،آزاد جموں و کشمیر میں 7 لاکھ 60 ہزار سے زائد بچوں کو پولیو کے قطرے پلائے جائیں گے ۔

این ای او سی کے مطابق7 روزہ قومی پولیو مہم میں 4 لاکھ سے زائد مرد و خواتین پولیو ورکرز اپنی ذمہ داریاں سر انجام دیں گے ، قوم کے مستقبل کو پولیو سے محفوظ بنانے کیلئے والدین پولیو ورکرز کے ساتھ بھرپور تعاون کریں اور 5 سال سے کم عمر بچوں کو پولیو سے بچائو کیلئے قطرے لازمی پلائیں ۔ 

دوسری جانب خاتون اول آصفہ بھٹو زرداری نے والدین، دیکھ بھال کرنے والوں، عوامی نمائندوں اور سماجی رہنماؤں پر زور دیا ہے کہ وہ ملک بھر میں شروع ہونے والی قومی انسداد پولیو مہم کی بھرپور حمایت کریں۔