بانی پی ٹی آئی نے سلمان اکرم راجہ کا استعفیٰ منظور کرنے سے انکار کردیا

راولپنڈی:پاکستان تحریک انصاف (پی ٹی آئی) کے بانی عمران خان نے پارٹی سیکریٹری جنرل سلمان اکرم راجہ کا استعفیٰ منظور کرنے سے انکار کردیا۔

تفصیلات کے مطابق اڈیالہ جیل کے باہر میڈیا سے گفتگو کرتے ہوئے سلمان اکرم راجہ نے کہاکہ میرے استعفے پر بانی پی ٹی آئی نہیں مانے، ضمنی الیکشن کے حوالے سے سیاسی کمیٹی کا اجلاس آج شام دوبارہ ہوگا، جس میں کوئی فیصلہ کیا جائےگا۔

میڈیا سے گفتگو میں ان کا مزید کہنا تھا کہ عمر ایوب اور شبلی فراز عدالتوں میں مقدمات بھگت رہے ہیں،بانی پی ٹی آئی نے اپوزیشن لیڈر قومی اسمبلی کے لیے محمود اچکزئی کا نام آج پھر دہرایا ہے۔

واضح رہے کہ گزشتہ روز پی ٹی آئی کے سیکریٹری جنرل سلمان اکرم راجہ نے ایک بیان میں کہا تھا کہ وہ سیکرٹری جنرل کے عہدے سے الگ ہورہے ہیں اور اب صرف قانونی معاملات پر اپنی توجہ مرکوز رکھیں گے۔

ان کا کہنا تھا کہ وہ بانی پی ٹی آئی عمران خان سے باضابطہ گزارش کر کے عہدے سے علیحدگی اختیار کریں گے تاہم بطور وکیل اپنی خدمات بلامعاوضہ پارٹی کے لیے جاری رکھیں گے۔